Завадная музыка, смачныя пахі блінцоў з рознымі прысмакамі, шашлыкамі і яркае сонейка так і вабілі. Праграма, у якой бралі ўдзел народны ансамбль народнай песні “Вербніца”, Раваніцкі вакальны калектыў “Крыніцы”, вакальны ансамбль з Турца “Завалінка”, стварала святочны настрой.
Паміж музычнымі нумарамі праводзіліся жартоўныя конкурсы, падрыхтаваныя работнікамі Горкаўскага дома фальклору, Велікапольскім і Лядзенскім клубамі. А дырэктар Новазелянькоўскага сельскага дома культуры В.Наркевіч падрыхтавала адмысловыя конкурсы для гледачоў на асобнай пляцоўцы. Напрыклад, удзельнікам з завязанымі вачыма трэба было вілкамі ўхапіць гаршчочак, які стаяў у печы. Тыя, хто здолеў праявіць спрыт і трапнасць, атрымлівалі маленькія падарункі. Перамога ў конкурсе на самы смачны блін таксама была за Новазелянькоўскім СДК.
Конкурс, без якога ніколі не абыходзіцца свята Масленіцы, – уздым за прызам на слуп – аказаўся у гэтым годзе без пераможцаў. Колькі ні стараліся хлопцы, аднак нікому не ўдалося дасягнуць запаветнага куфэрку з прызамі.
Не абыйшлося і без гандлёвай пляцоўкі ад Чэрвеньскага райпо, дзе можна было пакаштаваць гарачых блінцоў, духмяных піражкоў, смачных шашлыкоў і гарбаты.
Традыцыйна напрыканцы свята на вогнішча ўзнялі саламянае чучала, якое амаль імгненна знікла ў абдымках агню. І гэта найлепшая зарука таго, што вясна неўзабаве возьме свае правы. А ўдзельнікі свята яшчэ доўга весяліліся вакол вогнішча, вадзілі карагоды разам з вясёлым клоунам, рабілі сэлфі і частаваліся прысмакамі.
Алена Гоман
Дырэктар Чэрвеньскага РЦКіА
Карта сайта