Пра гэта распавёў «Раённаму весніку» ў пярэдадзень прафесійнага свята — Дня аўтамабіліста і дарожніка — дырэктар прадпрыемства Аляксандр Мальчык.
Прыбытковай працы падраздзялення грузавога транспарту найперш спрыяюць трывалыя сувязі з пастаяннымі заказчыкамі і пошук новых. Буйнейшым партнёрам аўтапарка з’яўляецца чэрвеньскае “ДРБУ-121”, якому аўтатранспартнае прадпрыемства аказвае паслугі па дастаўцы матэрыялаў для дарожнага будаўніцтва і вытворчасці асфальту. Плённа супрацоўнічае яно і з сельскагаспадарчымі арганізацыямі. Напрыклад, у гэтым годзе ўвесь аб’ём збожжа з гаспадарак у лік дзяржаўнага заказу быў перавезены на хлебапрыёмныя пункты транспартам аўтапарка.
Таксама сёлета прадпрыемства брала актыўны ўдзел у падрыхтоўцы Чэрвеня да абласнога фестывалю-кірмашу працаўнікоў вёскі “Дажынкі-2020”. Яго аўтамашыны працавалі на будаўніцтве такіх сацыяльна значных аб’ектаў, як раённы краязнаўчы музей і дзіцячыя яслі-сад у мікрараёне вуліцы Барыкіна, добраўпарадкаванні дваровых тэрыторый.
Каб грузавыя перавозкі і надалей прыносілі прыбытак, за апошнія тры гады тут набылі шэсць аўтамашын і два прычэпы.
Другі асноўны накірунак працы аўтапарка – пасажырскія перавозкі. Яны выконваюцца па 22 маршрутах агульнай працягласцю больш за тысячу кіламетраў з ахопам 125 населеных пунктаў раёна. На міжгародніх маршрутах аўтапарку даводзіцца працаваць ва ўмовах жорсткай канкурэнцыі з прыватнымі перавозчыкамі. Каб стварыць камфортныя ўмовы для паездак, летась прадпрыемства набыло тры новыя мікрааўтобусы.
Апошнім часам актыўна развіваюцца ў аўтапарку заказныя пасажырскія перавозкі. Ён працуе з такімі вядомымі кампаніямі, як “Дабраном”, “Белавія”, “Аэрапорт “Мінск”. А яшчэ — дастаўляе дзяцей у школу і дахаты ў сельскай мясцовасці.
Сярод перспектыўных накірункаў развіцця прадпрыемства – мадэрнізацыя ўчастка шынамантажу і удасканальванне маршрутнай сеткі пасажырскіх перавозак.
Карта сайта