Старшыня раённай арганізацыі Беларускага Саюза ветэранаў вайны ў Афганістане Віктар Казачонак, начальнік аддзела ідэалагічнай работы, культуры і па справах моладзі райвыканкама Лідзія Шчацінка, галоўны спецыяліст гэтага аддзела Марына Патапенка і прадстаўнікі Лядзенскага сельвыканкама ўсклалі кветкі да магілы Сяргея Грыбко.
Таксама адбылося ўскладанне кветак да помніка воінам-інтэрнацыяналістам на вуліцы Ленінскай у Чэрвені.
Звяртаючыся да ветэранаў вайны ў Афганістане, начальнік аддзела ідэалагічнай работы, культуры і па справах моладзі райвыканкама Лідзія Шчацінка шчыра падзякавала ім за актыўную грамадзянскую пазіцыю, неабыякавае стаўленне да лёсу маладога пакалення і дапамогу ў яго патрыятычным выхаванні на ўласным жыццёвым вопыце.
Затым воінаў-інтэрнацыяналістаў запрасілі на ўрачыстасць у Чэрвеньскую дзіцячую школу мастацтваў, у якой таксама ўзялі ўдзел ветэраны працы і навучэнцы прафесійнага будаўнічага ліцэя.
– Ніводная вайна не вырашае глабальных праблем – адзначыў, выступаючы на мерапрыемстве старшыня раённай арганізацыі Беларускага Саюза ветэранаў вайны ў Афганістане Віктар Казачонак. – Любыя канфлікты можна і трэба ўлагоджваць мірным шляхам. А для гэтага ўсім нам варта быць спакойнымі і разважлівымі.
Пра неабходнасць захоўваць, умацоўваць і берагчы мір таксама казалі ў сваіх выступленнях ветэран працы, дэпутат раённага Савета дэпутатаў Анатоль Кулік і начальнік аддзела ідэалагічнай работы, культуры і па справах моладзі райвыканкама Лідзія Шчацінка.
Канцэртныя нумары ўдзельнікам урачыстасці падаравалі выхаванцы і выкладчыкі школы мастацтваў. Ад імя прысутных Лідзія Шчацінка выказала падзяку калектыву ўстановы, які ў чарговы раз стаў ініцыятарам і арганізатарам такога мерапрыемства.
Карта сайта