Днямі пісьменніку, паэту і драматургу Генадзю Аўласенку споўнілася 70 гадоў.
З нагоды юбілею ў Чэрвеньскім раённым краязнаўчым музеі ладзілася сустрэча з прыхільнікамі яго таленту. Генадзь Пятровіч распавёў прысутным пра сваю літаратурную творчасць: з чаго пачынаў, што натхняла яго працаваць у розных жанрах. А гэта – вершы і казкі, апавяданні і аповесці, п’есы і фантастычныя раманы.
Біёлаг па адукацыі, вялікі аматар прыроды, ён шмат сваіх твораў прысвяціў менавіта ёй, жывёлам і раслінам. Асаблівае месца ў яго творчасці займаюць кнігі для дзяцей. А яшчэ ў Генадзя Пятровіча – цудоўнае пачуццё гумару, таму з-пад яго пяра выйшла шмат гумарыстычных вершаў.
На сустрэчы прагучалі вершы: вясёлыя, сумныя, філасофскія. Іх чытаў і сам аўтар, і прысутныя. Напрыканцы мерапрыемства яго ўдзельнікі павіншавалі Генадзя Пятровіча з юбілеем, пажадалі яму моцнага здароўя і далейшага плёну ў працы.
Таццяна Марцьянава, удзельніца сустрэчы. Фота аўтара
Карта сайта