У гэтым годзе Генадзю Мікалаевічу споўнілася б 85 гадоў з дня нараджэння.
Пасля змястоўнага расповеду пра жыццёвы і творчы шлях паэта, сябры клуба чыталі творы юбіляра. З замілаваннем слухалі запісы песень на словы паэта “Калыханка”, “Зачараваная” і “Завіруха”. Сябра клуба Уладзімір Адамовіч звярнуў увагу на тое, што яго збліжае з Генадзем Бураўкіным: яны дзеці вайны, скончылі філалагічны факультэт БДУ, асвойвалі цаліну. Цікавым быў яго расповед пра студэнцкае вяселле Генадзя з Юляй, якая таксама вучылася на філфаку. Уладзімір Паўлавіч адзначыў, што творы юбіляра жывыя, простыя і душэўныя. Ён са слязамі на вачах чытаў верш паэта пра родную мову.
Рубрыка “Наш каляндар” была прысвечана аматару паэзіі, нашай зямлячцы Святлане Адамовіч. Спачатку бібліятэкары пазнаёмілі прысутных з біяграфіяй Святланы Уладзіміраўны. Потым сябры клуба чыталі яе паэтычныя творы пра Радзіму, родную мову, Чарнобыль, нашых землякоў – Станіслава Манюшку і Марылю Мякота, маці Максіма Багдановіча. Шмат паэтычных твораў прысвяціла Святлана Адамовіч нашым братам меньшым, роднай прыродзе, кветкам, якія яна любіць з дзяцінства і вырошчвае сама. А яе вершы пра каханне, пэўна, нікога не пакінуць абыякавымі.
Сябра клуба Алена Шульга адзначыла, што вершы Святланы добрыя, чыстыя і светлыя. Яны напісаны з душой. Так можа напісаць толькі таленавіты чалавек, які ўлюблёны ў свой край – адзначыла Алена Аляксееўна.
Чарговае пасяджэнне праходзіла ў онлайн фармаце.
Наступная сустрэча адбудзецца ў верасні і будзе прысвечана беларускім паэтам Нілу Гілевічу і Сяргею Законнікаву.
СВЯТЛАНА ЖДАНОВІЧ,
загадчык аддзела абслугоўвання і інфармацыі
цэнтральнай раённай бібліятэкі
Карта сайта