Дата правядзення урачыстасцяў - 17 снежня звязана з выхадам пастановы Савета народных камісараў аб пачатку кінавытворчасці ў Беларусі. У гэты ж дзень Народны камітэт асветы стварыў дзяржкіраванне «Белдзяржкіно», якое адказвае за працу кінематографа. Адбылася дадзеная падзея 95 гадоў таму, у 1924 годзе.
Гэта свята не толькі работнікаў кіно, але і ўсіх прыхільнікаў і аматараў аднаго з самых відовішчных відаў мастацтва.
Нашы таленавітыя кінематаграфісты праз свае фільмы змаглі паказаць свету самабытныя традыцыі і багатую духоўную культуру беларускага народа. Здолелі стварыць у вялікім свеце кіно непаўторны вобраз сваёй краіны, свайго народа.
Вялікі ўклад у развіццё гэтай найважнейшай галіны культуры ў нашым рэгіёне ўносяць работнікі аддзела па кiнавiдэаабслугоўванню насельніцтва Чэрвеньскага раёна.
Калектыў аддзела невялікі. Але тут працуюць адказныя, адданыя кіно прафесіяналы: начальнік аддзела Наталля Дамасевiч, вядучы інжынер Ігар Сломенец, кінамеханік Сяргей Бандаровіч, якія больш за трыццаць гадоў не змяняюць аднойчы абранай прафесіі.
- Галоўная задача нашага калектыву - прапаганда лепшых стужак беларускага і сусветнага кінематографа, удзел у працы па патрыятычным выхаванні насельніцтва і асабліва маладога пакалення, - кажа начальнік аддзела Наталля Дамасевiч. - У 2016 годзе ў кінатэатры ўстаноўлена лічбавае абсталяванне. Цяпер гледачы могуць глядзець фільмы ў 3D фармаце з добрым гукам і ў добрай якасці. Акрамя таго, стараемся стварыць камфортныя ўмовы для прагляду кінастужак. У 2020 годзе запланавана рэканструкцыя глядзельнай залы і фае.
Віншуем работнікаў Чэрвеньскага аддзела кiнавiдэаабслугоўвання з іх святам. Жадаем творчых поспехаў і працвітання калектыву!
Галіна Гамеза. Фота аўтара
Карта сайта