У нашым раёне - гэта ўжо другая выстава мастачкі. Толькі зараз - гэта не казачныя персанажы, а лялькі розных гадоў савецкай эпохі, пачынаючы з 40-х гадоў мінулага стагоддзя.
Медык па адукацыі, Святлана Кузьмічова пакінула працу і цалкам прысвяціла сябе любімай справе - стварэнню лялек. Яе ўжо добра ведаюць у Беларусі - майстар-класы мастачкі друкаваліся ў часопісе «Ксюша». Акрамя таго, яна піша казкі, займаецца аплікацыяй, вязаннем, шыццём.
Першымі наведвальнікамі выставы сталі вучні Смілавіцкай СШ №2. Лялек на выставе вельмі шмат: гэта лялькі, вырабленыя ў розныя гады з розных матэрыялаў і з розных краін. Вось - лялькі вайскоўцы: будзёнавец, ваенны санітар і сястра міласэрнасці, бравы салдат з гармонікам і нават спецназавец. Побач - лялькі, у вопратцы людзей розных прафесій: сцюардэса і будаўнік, афіцыянт і швачка... На выставе можна ўбачыць і вучняў з настаўніцай, і лялькі ў нацыянальных строях народаў з былых саюзных рэспублік і замежных краін, а таксама цацкі розных гадоў: кубікі і більярд , настольныя гульні, мячы, паштоўкі і многае іншае. На выставе ёсць і самая вялікая лялька, зробленая ў савецкі час на Днепрапятроўскай фабрыцы цацак. Гэта лялька Наташа, яе рост - 76 сантыметраў.
Выстава цікавая на толькі дзецям. Яе наведваюць і дарослыя. Цікавяцца імі і хлопчыкі. Ім падабаюцца гульні мінулых гадоў.
Ірына Вабішчэвіч распавядае наведвальнікам пра гісторыю стварэння гэтай калекцыі лялек. Выстава яшчэ раз дае магчымасць дарослым акунуцца ў свет дзяцінства...
Выстава будзе доўжыцца да 24 студзеня 2020 года. Уваход платны.
Таццяна Марцьянава.
Фота аўтара і Ірыны Вабішчэвіч
Карта сайта