На навагодняе свята, якое прайшло ў рамках дабрачыннай акцыі «Нашы дзеці», сюды прыехала шмат гасцей. Сярод іх не толькі Дзед Мароз і Снягурка. Ролю чараўнікоў прымерылі на сябе міністр працы і сацыяльнай абароны Ірына Касцевіч, старшыня камітэта па працы, занятасцi i сацыяльнай абароне Мінскага аблвыканкама Тамара Красоўская, старшыня Мiнскай абласной арганізацыі прафсаюза работнікаў дзяржустаноў Уладзімір Філімонаў, старшыня Чэрвеньскага райвыканкама Віталь Казлоў, дырэктар цэнтра па працы з кадрамі Белаграпрамбанка Іван Капелька, прадстаўнікі прыватнага бізнесу, футбольнага клуба «Крумкач», выхаванкі Нацыянальнай школы прыгажосці, святары, валанцёры.
Падарункі яны прывезлі не толькі салодкія: дому-інтэрнату перадалі модульную мэблю для гульнявога пакоя, грашовыя сертыфікаты, бытавую і музычную тэхніку і шмат іншых неабходных для ўстановы прэзентаў.
Як адзначыла Ірына Касцевіч, Новы год - гэта свята, якое аб'ядноўвае:
- Мы ўсе павінны жыць адной дружнай сям'ёй, і хай 2020-ы прынясе выхаванцам дома-інтэрната і тым, хто робіць усё, каб яны выраслі выдатнымі людзьмі, толькі станоўчыя эмоцыі.
- У Новы год прынята жадаць цудаў, і я жадаю, каб гэтыя цуды адбыліся, - дадала Тамара Красоўская. - Каб кожнае дзіця было шчаслівы ў гэтым доме, каб у ім было цёпла і ўтульна, а дзяцей атачалі дабро і клопат.
Тамара Красоўская падзякавала ўсім, хто сваёй штодзённай працай клапоціцца пра дзяцей, і ўручыла шэрагу работнікаў установы за добрасумленную працу Граматы і Падзякі.
Дырэктар дома-інтэрната Эла Барысава выказала ўпэўненасць, што дружба ўстановы з сацыяльнымі партнёрамі, у тым ліку новымі, захаваецца і ў новым годзе.
У падзяку за праяўленую ўвагу работнікі ўстановы сумесна з выхаванцамі падрыхтавалі спектакль «Лета пад Новы год».
Таццяна Марцьянава. Фота аўтара
Карта сайта