Праблема маленькай па памерах пляцоўкі, з якой «Будаўнік-Мінск Юнайтэд» паспяхова справіўся падчас гасцявой сустрэчы з «Крупкамі», на гэты раз зноў была актуальнай. У Нясвіжы нашы футбалісты пазбавіліся свайго галоўнага козыра - прыгожай і выніковай камбінацыйнай гульні.
Гаспадары ж залы пры аглушальнай падтрымцы сваіх заўзятараў і даволі неадназначным судзействе вельмі паспяхова выкарыстоўвалі тактыку «бі-бяжы». У першым тайме яны не толькі тройчы прымусілі капітуляваць галкіпера чэрвенцаў Андрэя Напарко, але і захавалі ў недатыкальнасці ўласныя вароты.
Пасля перапынку «Нясвіжу» заставалася толькі не разгубіць салідны галявы запас. Гэтую задачу нашы супернікі вырашалі усімі магчымымі спосабамі, пачынаючы ад шчыльнай гульні ў абароне і заканчваючы доўгімі ўводамі мяча з-за межаў пляцоўкі.
Інтрыга ў сустрэчы адрадзілася ў апошнія дзесяць хвілін. Спачатку мяч, нарэшце, трапіў у вароты «Нясвіжа» пасля далёкага ўдару Дзмітрыя Чыстага, а затым Андрэй Лапшын скараціў разрыў у рахунку да мінімуму. Аднак на апошніх секундах гульні гаспадары пляцоўкі вызначыліся ў чацвёрты раз...
Калі ацэньваць вынік гэтага паядынку аб'ектыўна, то перамога дасталася тым, хто больш яе жадаў. Трэба прызнаць, што пры ўсіх праблемах з памерамі пляцоўкі і судзействам, нашы футбалісты не выкарыстоўвалі зручныя моманты для ўзяцця варот, якія павінны былі выкарыстоўваць. Так што працу над памылкамі прыйдзецца зрабіць, каб, прайграўшы бой, не прайграць бітву.
Нягледзячы на паразу ў Нясвіжы, «Будаўнік-Мінск Юнайтэд» захаваў першы радок у турнірнай табліцы чэмпіянату. Наступны матч наша каманда правядзе 12 студзеня на сваёй пляцоўцы з «Любанню».
Ігар Адамовіч. Фота аўтара
Карта сайта