Адкрыла мерапрыемства Людміла Дарагуж словамі:
- Як прыемна, што наша сённяшняя сустрэча праходзіць менавіта ў гэты выдатны час, калі суквецце зімовых святаў аб'яднала мільёны людзей ва ўсім свеце і напоўніла сэрца такімі высакароднымі пачуццямі, як вера, любоў і радасць. Самы галоўны падарунак, які падае кожнаму з нас Раство, незалежна ад таго, калі мы яго адзначаем - 25 снежня або 7 студзеня - гэта надзея на лепшае. І таму я хачу кожнаму з вас пажадаць веры, любові, дабра і каб вы ніколі ў жыцці не гублялі надзею - надзею на лепшае. З святам!
Музычная праграма пачалася з выступлення народнага вакальнага ансамбля «Рэха», у складзе якога - настаўнікі Чэрвенскай дзіцячай школы мастацтваў (кіраўнік - Галіна Прышывалка). У выкананні калектыву прагучалі традыцыйныя калядныя творы на беларускай і польскай мовах.
Папуры на тэмы навагодніх песень выканаў Саша Дадалка, (4 клас, цымбалы, настаўнік - Вераніка Цебiкава).
Далей Людміла Уладзіміраўна працягнула:
- Перш чым сустракаць новы год, звычайна мы развітваемся з годам якія сыходзiць, успамінаем ўсё добрае, што ў ім адбылося і дзякуем яму за гэта.
Для нашай школы мінулы год быў як ніколі насычаны падзеямі ў творчым жыцці. Нашы выхаванцы неаднаразова прымалі ўдзел у музычных фестывалях і конкурсах, якія праводзіліся ў розных гарадах краіны. Нягледзячы на тое, што ім даводзілася спаборнічаць з юнымі музыкантамі з Магілёва, Мінска, Полацка, Оршы, Салігорска, яны заўсёды годна прадстаўлялі нашу школу і ніколі не вярталіся без узнагарод. Некаторыя вучні нават удзельнічалі ў двух конкурсах і за ўдалае выкананне конкурснай праграмы двойчы атрымалі Дыпломы.
Канцэртную праграму працягнулі вучні. Сафія Кавалевіч (2 клас, фартэпіяна, настаўнік - Маргарыта Коршунава) выканала твор В.Моцарта «Менуэт». Дзяўчынка атрымала Дыплом трэцяй ступені за ўдзел у конкурсе «Яго вялікасць раяль», які праводзіўся ў снежні ў Беразіно. Яна Цітова, таксама выхаванка Маргарыты Коршунавай (4 клас), выканала твор гэтага ж кампазітара «Арыя». «Менуэт» - фартэпіянны твор кампазітара Д.Цыполi прагучаў ў выкананні Ганны Міцкевіч (4 клас, настаўніца - Таццяна Чыстая). Папуры на тэмы народных мелодый выканаў фартэпіянныя дуэт у складзе Лізы Гоман і Леры Янчэўскай (3 клас, настаўнік - Маргарыта Коршунава). Дуэт быў ўдастоены Дыплома першай ступені ў намінацыі «Ансамблевае выкананне» на конкурсе ў Беразіно. Акрамя таго, Лера Янчэўская стала лаўрэатам конкурсу «Вясёлка талентаў», які адбыўся ў Івацэвічах, за сольнае выкананне конкурснай праграмы на фартэпіяна. Аня Шукан, вучаніца 6 класа, выканала прэлюдыі C-DUR Іагана-Себасцьяна Баха (настаўнік - Таццяна Чыстая). Вальс AS-DUR Станіслава Манюшкі прагучаў у выкананні Лізы Лазоўскай (6 клас, настаўнік - Галіна Прышывалка). Дарэчы, Ліза двойчы прымала ўдзел у конкурсах - у Беразіно і ў Мар'інай Горцы, дзе была ўдастоена дыпломаў другой і трэцяй ступеняў.
Людміла Дарагуж нагадала, што мінулы год быў годам 200-годдзя з дня нараджэння нашага славутага земляка Станіслава Манюшкі. Яна паведаміла прысутным пра тое, што дэлегацыя з Чэрвеня, у складзе якой былі і настаўнікі школы мастацтваў, пабывала ў Вільні на мерапрыемствах, прысвечаных юбілею кампазітара і распавяла пра месцы ў Вільні, звязаных з яго імем. А яшчэ прачытала верш Віктара Шніпа «Мне сніўся Вільнюс».
Далей у канцэртнай праграме выступіла народная музычная капэла «Ігуменскі крыніцы», якая выканала тры творы С.Манюшкі: «Калыханка», польку «Вясновую» і вальс AS-DUR .
Завяршылася мерапрыемства выкананнем твора С.Манюшкі «Родны наш край» ансамблем «Рэха» ў суправаджэнні музычнай капэлы «Ігуменскі крыніцы».
Таццяна Марцьянава.
Фота Галіны Прышывалка
Карта сайта