У рамках візіту на Міншчыну дэлегацыі Архангельскай вобласці абласны камітэт БРСМ арганізаваў шэраг сустрэч і экскурсій, прысвечаных 75-годдзю Перамогі ў Вялікай Айчыннай вайне. У адной з такіх сустрэч удзельнічаў першы сакратар Чэрвеньскага райкама БРСМ, кіраўнік абаронна-спартыўнага маладзёжнага клуба «Патрыёт» Павел КЛЫНДЗЮК.
У час мерапрыемства, якое праходзіла у абкаме БРСМ, Павел правёў для гасцей з Расіі прэзентацыю «Патрыёта». Тэма вельмі зацікавіла расіян, так як некаторыя з іх удзельнічаюць у падобным клубе ў сябе на радзіме. Хлопцы абмяняліся вопытам.
Сацсеткі распаўсюджваюць інфармацыю вельмі хутка. Ужо праз пару гадзін, даведаўшыся, што яго падапечныя сустрэлі ў Беларусі таварышаў па духу і паплечнікаў, Паўлу патэлефанаваў з Архангельска кіраўнік гэтага клуба і прапанаваў развіваць дружбу і супрацоўніцтва.
Як распавёў Павел КЛЫНДЗЮК, архангельскі патрыятычны клуб запрасіў нашых хлопцаў у госці, і, калі будзе фінансавая магчымасць, то актывісты «Патрыёта» пабываюць у старадаўнім паморскім горадзе на якім-небудзь цікавым мерапрыемстве, свяце або маштабнай акцыі.
Наталля КАРАЛЬКЕВІЧ. Здымкі Паўла КЛЫНДЗЮКА
Карта сайта