Яна нарадзілася і ўсё жыццё пражыла ў вёсцы Старына. Да вайны паспела скончыць сем класаў, пасля двухмесячных курсаў стала сама вучыць дзяцей у Гарадзішчанскай пачатковай школе, непадалёк ад вёскі Турэц. Марыла стаць прафесійным настаўнікам, паступіла ў Мінскае педагагічнае вучылішча, але правучылася толькі год: пачалася вайна. Калі ў акрузе сталі дзейнічаць партызаны, фашысты страшна каралі ўсіх, хто быў з імі звязаны. А так, як бацька Таццяны дапамагаў партызанам зброяй, прадуктамі, адзеннем, то сям'я паплацілася за гэта жорстка. Маму Таццяны і двух сясцёр забралі ў турму (яны загінулі ў лагеры ў Трасцянцы), дом спалілі. Таццяна з малодшай сястрычкі Анютай цудам пазбеглі арышту. Іх схавала суседка. Разам з бацькам сёстры сышлі ў партызанскі атрад імя Юрчанка. Да гэтага часу Таццяна Тарасаўна захоўвае дарагія сэрцу дакументы. У адным з іх напісана: «Я, Раброў Уладзімір Міхайлавіч, былы камандзір партызанскага атрада імя Юрчанка 1-ай Мінскай партызанскай брыгады, пацвярджаю: грамадзянка Шатэрнік Таццяна Тарасаўна, ураджэнка вёскі Старына Чэрвеньскага раёна, з'яўляецца сувязной партызанскага атрада з чэрвеня 1943 года па ліпень 1944 года. Па стане здароўя з'яўляецца інвалідам ад нараджэння, што дазволіла выкарыстоўваць яе для сувязі з гарнізонамі суперніка ў мястэчках Смілавічы і Дукора без падазрэнняў. Акрамя дадзеных аб суперніку, Шатэрнік Т. пастаўляла у партызанскі атрад медыкаменты і соль». Таццяна Тарасаўна з'яўлялася таксама сувязной партызанскага атрада імя газеты «Праўда», партызанскай брыгады імя газеты «Праўда». Пра гэта запісана ў пасведчанні партызана Беларусі, выдадзеным Чэрвенскім райвыканкамам у лістападзе 1975 года. Таццяна Тарасаўна мае Пасведчанне ўдзельніка Вялікай Айчыннай вайны. Дзяўчына часта хадзіла на розныя заданні. Аднойчы паліцаі жорстка збілі яе... Адно вока з таго часу дрэнна бачыць. З часам зрабілі аперацыю, але паляпшэнняў гэта не дало. Пасля вайны Таццяна працавала ў школе 4 гады, але ў яе не было спецыяльнай адукацыі, прыйшлося перайсці падлікоўцам ў мясцовую гаспадарку, працавала памочнікам фельчара, санітаркай у Старынскім фельчарска-акушэрскі пункце. Агульны працоўны стаж Таццяны Тарасаўны складае 40 гадоў і 6 месяцаў, працоўнай - 33 гады і 8 месяцаў.
За ўдзел у партызанскім руху Таццяна Тарасаўна ўзнагароджана Ордэнам Айчыннай вайны II ступені. Мае знак «Партызан Беларусi», медаль «Ветэран працы».
Таццяна Тарасаўна шчаслівая ў дзяцях, унуках, праўнуках. Яны не забываюць сваю родную, імкнуцца стварыць ёй палепшаныя ўмовы пражывання, часта наведваюць, клапоцяцца пра здароўе і дабрабыт. У святочны дзень з віншаваннямі і падарункамі да Таццяны Тарасаўна прыехаў старшыня раённага савета ветэранаў Іван Фёдаравіч Ладуцька. Ён пажадаў імянінніцы здароўя, бадзёрасці, актыўнасці, радасці і ўвагі ад блізкіх людзей.
Галіна Гамеза. Фота аўтара
Карта сайта