Кніга прысвечана 31-й гадавіне вываду савецкіх войскаў з Афганістана. Некалькі яе глаў - пра нашых землякоў-чэрвенцаў.
Главы кнігі распавядаюць пра доблесных воінаў з розных гарадоў былога СССР. Геаграфія твора - Крычаў і Смаленск, Масква і Мар'іна Горка, Рослаў і Клімавічы, Чэрвень і Екацерынбург, Мінск і Беразіно, Бабруйск, Пячоры. Аўтары кнігі ўсіх, пра каго напісалі, ведаюць асабіста, шмат размаўлялі з імі на тэму афганскай вайны, таму тварэнне сваё прапусцілі праз сэрца.
Адным з найбольш славутых і дзейсных па баявых дзеяннях вайсковых падраздзяленняў у Афганістане была 459 асобная рота спецназа. Паміж сабой ваенныя клікалі і цяпер клічуць яе «кабульскай». У 1987 годзе гэтай ротай камандаваў наш зямляк, капітан Уладзімір ДЗЯДЗЕЛА. Менавіта пра яго і славутую 459-ю гаворыцца ў прадмове да кнігі, напісанай Аляксандрам Балдоўскім. Глава ж пра Уладзіміра ДЗЯДЗЕЛА называецца «Бясстрашны ротны».
Яшчэ адзін герой кнігі - Віктар КАЗАЧОНАК. Ён падчас выканання інтэрнацыянальнага абавязку быў ваенным кіроўцам, здзейсніў пяцьдзесят рэйсаў з Саюза ўглыб Афганістана. За выратаваныя з-пад абстрэлу падчас засады ў гарах машыну з боепрыпасамі атрымаў медаль «За адвагу».
З дваццаці пяці раздзелаў кнігі, якія распавядаюць аб дваццаці пяці «афганцаў», толькі адна прысвечана прадстаўніцы жаночага полу, і гэта - жыхарка Чэрвеня. Ала ДЗЯДЗЕЛА паехала ў Кабул добраахвотна, каб працаваць там па прафесіі, поварам. З акна кухні часта чула, як строгі камандзір роты бязлітасна муштруе на пляцы падначаленых. Потым давялося пазнаёміцца асабіста, і ў рэшце рэшт дзёрзкі капітан і бойкая кухарка закахаліся на ўсё жыццё, праявіўшы сябе на самай справе для калег і адзін для аднаго вельмі душэўнымі, добрымі і клапатлівымі людзьмі.
Кожны, каму была прысвечана глава кнігі, ці ж сваякі загінулага або памерлага воіна-інтэрнацыяналіста, атрымалі памятны асобнік, падпісаны аўтарамі.
Аўтары выказваюць шчырую ўдзячнасць Чэрвенскай раённай першаснай арганізацыі Беларускага саюза ветэранаў вайны ў Афганістане і яе старшыні Віктару КАЗАЧОНКУ, ваеннаму камісару Чэрвеньскага і Бярэзінскага раёнаў Дзмітрыю Сініцкаму, раённай арганізацыі БРСМ і яе першаму сакратару Паўлу КЛЫНДЗЮКУ і заснавальніку ТАА «Марвiка» Андрэю Качову за маральную падтрымку і фінансавую дапамогу, аказаную пры выданні кнігі. Падчас прэзентацыі Аляксандр Балдоўскі адзначыў выдатную якасць працы Чэрвенскай друкарні, дзе выдавалася кніга.
Наталля КАРАЛЬКЕВІЧ. Фота аўтара.
На здымку: Уладзімір ДЗЯДЗЕЛО, Міхаіл СЫЧ, Віктар КАЗАЧОНАК і Аляксандр БАЛДОЎСКІ з асобнікамі новай кнігі
Карта сайта