Спаленая Папова Града не адрадзілася з попелу, у які яе ператварылі фашысты. Людскія галасы тут - рэдкасць, і заўсёды гэта галасы смутку і памяці. Так было і сёння, у час мітынгу-рэквіема, прысвечанага 75-годдзю Вялікай Перамогі.
Адзінаццаць двароў налічвала Папова Града да вайны. У 1944-м падчас карнай аперацыі акупанты загубілі 55 чалавек, большасць з якіх - дзеці. Жыццё з вёскі сышло назаўжды, засталіся толькі боль і памяць, захоўваемыя стылізаванымі «зрубамі» са спісамі загінуўшых.
Для Чэрвеньшчыны гэта свая мясцовая Хатынь, таму кожны год падчас акцый памяці тут збіраецца грамадскасць і кіраўніцтва раёна, каб ускласці кветкі да мемарыяла і ўшанаваць памяць усіх ахвяр той вельмі жорсткай вайны.
Сёння, напярэдадні 75-годдзя Вялікай Перамогі, на мемарыял «Папова Града» прыехала кіраўніцтва раёна, прадстаўнікі сілавых структур і грамадска-патрыятычных арганізацый.
Перад прысутнымі выступіла намеснік старшыні райвыканкама Ала ШАХОЦЬКА.
Памяць загінулых ушанавалі хвілінай маўчання. Да помніка і стылізаваных «зрубаў» усклалі вянкі і кветкі.
Таксама ўдзельнікі мітынгу наведалі пахаванні і помнікі загінулым падчас вайны чырвонаармейцам і мірным грамадзянам у вёсках Арэхаўка і Грабянец.
Наталля КАРАЛЬКЕВІЧ. Фота аўтара
Карта сайта