Дырэктар школы Галіна Прышывалка павіншавала выпускнікоў і ўручыла сведчанні аб дадатковай адукацыі дзяцей і моладзі.
Чатыры сведчанні выдадзены з адзнакай: Анастасіі Пузанковай (скрыпка), Арцёму Урублеўскаму (гітара), два сведчанні адразу ўручаны Юліі Баброўскай (фартэпіяна і аб заканчэнні мастацкага аддзялення).
Мама Юліі Людміла Баброўская ад імя бацькоў звярнулася да педагогаў.
- Школа - унікальная навучальная ўстанова, - сказала яна. - Тут не проста вучаць гульні на нейкім інструменце, спяваць, танцаваць, маляваць, мастацкаму слову, але і прывіваюць любоў да мастацтва, вучаць дзяцей ўменню распараджацца сваім часам. Вы былі не проста настаўнікамі і выхавацелямі для нашых дзяцей, вы шчодра дзяліліся сваім душэўным цяплом, выяўляючы самыя лепшыя якасці педагогаў - цярпенне, прафесіяналізм, такт, клопат. Школа захоўвае і прымнажае багатыя традыцыі, якія склаліся дзесяцігоддзямі. Дзякуй вам за адданасць справе і самаадданую працу. Нізкі паклон усім. Таленавітых вам вучняў, новых вялікіх поспехаў.
Выпускнікам Людміла Баброўская пажадала зрабіць у жыцці правільны выбар.
— І якую б дарогу вы ні абралі, няхай гэтая дарога прывядзе вас да поспехаў, - дадала яна. Як маці і настаўнік яна яшчэ дала дзецям некалькі саветаў, якіх неабходна прытрымлівацца ў жыцці.
Галіна Прышывалка адзначыла, што не было б поспехаў у хлопцаў, калі б не было супрацоўніцтва з бацькамі. З імі педагогі пастаянна падтрымлівалі сувязь. За дапамогу і падтрымку Падзякі школы абвешчаныя некаторым бацькам выпускнікоў: Юліі Баброўскай, Арцёма Урублеўскага, Ганны Новік, Анастасіі Пузанковай, Ганны Шукан і бабулям: Паўла Маковіча і Дзмітрыя Баркоўскага. Станіслава Баркоўская таксама выказала словы ўдзячнасці ўсім педагогам. Яна назвала школу сапраўдным храмам мастацтва.
Пасля ўрачыстай часткі выпускнікі школы прадэманстравалі свае таленты: адбыўся святочны канцэрт.
Таццяна Марцьянава.
Фота аўтара
Карта сайта