Інспектар па справах непаўналетніх Юлія БУРКУН, выступаючы перад малодшымі школьнікамі, якія прыйшлі на мерапрыемства, нагадала, як важна ведаць асноўныя правілы паводзін. Хлопцы хутка і зладжана адказвалі на яе пытанні: як сябе паводзіць, калі сядзіш адзін дома; як правільна пераходзіць дарогу; як сябе паводзіць у грамадскім месцы; чаму нельга браць чужое; у якіх месцах можна катацца на ровары.
Старэйшы дзяржаўтаінспектар ДАІ Аляксандр МАНУЛІК усім жадаючым дапамог прымерыць ахоўныя спецсродкі: шлем, бронекамізэльку; дазволіў кожнаму жадаючаму пасядзець у патрульнай машыне і зрабіць аб'яву ў гучнагаварыцель.
Асаблівае захапленне ў дзетак выклікаў «дагляд» металадэтэктарам: падчас «асабістага ператрусу» ва ўсіх у кішэнях нешта пішчала і былі знойдзеныя ўсе металічныя прадметы, ад тэлефона да капейкавай манеткі.
Мерапрыемства супрацоўнікаў РАУС у Дзень абароны дзяцей называлася «Увага - дзеці!» і праведзена ў рамках рэспубліканскай міжведамаснай праграмы «Клопат-2020».
Ратавальнікі з раённага аддзела МНС таксама прыбылі на Дзень абароны дзяцей. Іх частка праграмы складалася з гутаркi аб бяспечным абыходжанні з агнём і паводзінах у надзвычайных сітуацыях. Усе хлопцы атрымалі маляўнічыя плакаты і кніжкі-размалёўкі з правіламі бяспекі. Таксама ўсе жадаючыя маглі прымерыць форму пажарнага і зразумець, што нялёгка ў такім абмундзіраванні яшчэ і выразна выконваць складаныя дзеянні!
Якое дзіцячае свята без вясёлых гульняў і конкурсаў? Работнікі цэнтра культуры і вольнага часу падрыхтавалі вялікую забаўляльную праграму з «пікетамі», на кожным з якіх хлапчукі і дзяўчынкі спаборнічалі ў спрыце, хуткасці і трапнасці. Вядучыя Валянцін Мароз і Вольга Кузюткіна літаральна вадзілі за сабой хлопцаў вакол будынка цэнтра, каб на кожным з пікетаў пагуляць з дарослымі, якія дзяжурылі там, раздавалі цукеркі за ўдалыя выступленні.
У дні абароны дзяцей у РЦКiД пад наглядам сваіх педагогаў удзельнічалі вучні малодшых класаў школ горада, з першага чэрвеня наведваючыя лагеры адпачынку, або «пляцоўку». Наперадзе ў хлопцаў яшчэ тры тыдні змястоўнага адпачынку і цікавых мерапрыемстваў.
Наталля КАРАЛЬКЕВІЧ. Фота аўтара
Карта сайта