Правесці дабрачынную акцыю па добраўпарадкаванні да Дня абароны дзяцей прапанаваў у канцы мая райкам БРСМ. Жыхары Чэрвеня адгукнуліся і дапамаглі.
Вялікую частку раслін для далейшага добраўпарадкавання тэрыторыі перадалі чэрвеньскія садоўнікі-аматары Раіса Целяціцкая, Аляксандра Раманькова і Любоў Грынько. Усе яны - пенсіянеркі, члены раённага Савета ветэранаў і актыўныя ўдзельніцы многіх грамадскіх мерапрыемстваў. Калі жанчыны даведаліся пра заклік райкама БРСМ дапамагчы выхаванцам Цэнтра, яны з задавальненнем падзяліліся раслінамі са сваіх прысядзібных участкаў. Некалькі дрэў перадала ў Цэнтр і рэдакцыя.
Раіса Целяціцкая сабрала таксама і міні-бібліятэчку з развіваючых дзіцячых кніжак. Любоў Джафарова перадала ад раённай арганізацыі «Чырвонага крыжа» пальчаткі і маскі для тых, хто адвозіў расліны ў Цэнтр. Першы сакратар райкама БРСМ Павел Клындзюк і старшыня раённага Савета ветэранаў Іван Ладуцька пасадзяць расліны і дрэвы, як толькі ўсталюецца добрае надвор'е.
Такім чынам, хоць і не адбылося з-за каранавiруса прамога кантакту з выхаванцамі Цэнтра, але добрая справа выканана і застанецца з дзецьмі і іх педагогамі, даючы халаднаватую летнюю цень, прыгажосць, добры настрой і веру ў здольнасць людзей ад чыстага сэрца рабіць дабро.
Наталля КАРАЛЬКЕВІЧ. Фота аўтара
Карта сайта