20 донараў здалі кроў у Чэрвенскай цэнтральнай раённай бальніцы.
Донары - розныя людзі: з рознымі лёсамі, рознымі прафесіямі, розным узростам, але падобныя адным: яны ратуюць чыёсці жыццё, аддаючы сваю кроў, не атрымліваючы якога-небудзь істотнага матэрыяльнага ўзнагароджання.
- Сёння добраахвотна здалі кроў 20 чэрвенцаў, - сказаў намеснік галоўнага лекара УЗ «Чэрвеньская цэнтральная раённая бальніца» Аляксандр Аносаў. - Цяпер, у сувязі з эпідсітуацыю, асабліва старанна адбіраюцца прэтэндэнты на донарства. Перш чым стаць донарам, кожны чалавек праходзіць абавязковае медыцынскае абследаванне, падчас якога патэнцыйным донарам вымяраюць ціск і праводзяць аналіз крыві. Па выніках працэдуры, якая займае каля 15-20 хвілін, спецыялісты прымаюць рашэнне, ці можа чалавек стаць донарам.
Да працэдуры дапусцілі не ўсіх. З-за самаадчування не змаглі здаць кроў некалькі чалавек. Бывае, пасля здачы, чалавеку становіцца дрэнна, закружыцца галава ці занудзіць. Але, як правіла, працэдура праходзіць без бачных змен самаадчування.
У дзень донара працавала брыгада з Рэспубліканскага навукова-практычнага цэнтра трансфузіялогіі, г.Мінск.
Пачаўся працэс здачы крыві са сняданку. Перад данацыяй усе пілі гарбату з печывам, патэнцыйным донарам выдалі шакалад для паляпшэння самаадчування і паскарэння току крыві, а потым - яны цярпліва чакалі сваёй чаргі. Пасля здачы крыві донары атрымалі грашовую кампенсацыю на абед у памеры 24 рублёў.
Аляксандра Тарасёнок:
- Здаю кроў ужо дваццаць гадоў. Апошнія два гады - бязвыплатна. Прыемна думаць, што твая кроў дапаможа выратаваць чыёсцi жыццё.
Наталля Каратчэня: - Я не ў першы раз здаю кроў. Для мяне гэта ўжо неабходнасць. Мая кроў можа спатрэбіцца людзям, якія трапілі ў бяду - хворым, параненым, якія пацярпелі ў надзвычайных сітуацыях, таму я тут.
І такое меркаванне было ва ўсіх, хто сёння прыйшоў здаць кроў бязвыплатна...
Таццяна Марцьянава.
Фота аўтара
Карта сайта