Пры ўездзе ў паселішча пра трагедыю, што здарылася тут, нічога не нагадвае. Але ўжо ў сярэдзіне вуліцы Калінінскай адкрываецца жахлівая панарама разбурэнняў. Пры гэтым відно, што віхура ішла па дыяганалі, захапіўшы яшчэ і Другі завулак Калініна. Тут моцна пацярпеў дом нумар адзін, дзе з вясны да восені жыве Яніна Антонаўна Камейка. Вецер знёс дах хаты, а цэгла з разбуранага коміна прабіла столь.
– Прыехалі забраць маму да сябе, – распавядае дачка Яніны Антонаўны Алена. – Яна ў вялікай роспачы, ноч не спала, увесь час плача. Жыць у доме немагчыма, ад саду практычна нічога не засталося. Сіла ветру была такой, што са скрынкі выкінула і адарвала ад шлангу газавы балон…
– Усё адбылося літаральна за паўхвіліны, – узгадвае другая дачка гаспадыні сядзібы Ірына, якая ў нядзелю разам з мужам і дзецьмі гасцявала ў маці. – Мы ледзь ускочылі ў хату, дзверы немагчыма было ні адчыніць, ні зачыніць. Ужо праз вакно ўбачыла, як па двару лётае шыфер. Паламаныя лісты ўваткнуліся ў зямлю ў некалькіх сантыметрах ад нашай машыны. Добра, што ўсе засталіся ў прыбудове, не пайшлі ў прыхожую, дзе абрынулася столь…
На суседнім падворку ўраган таксама нарабіў бяды: паразбівала шыбы ў вокнах хаты, пашкодзіла абабітыя сайдынгам сцены, раскрыла дах на доме і гаспадарчых пабудовах, зруйнавала зладжаную з блокаў лазню, паламала плот, пакрышыла цяпліцу, знішчыла пладовыя дрэвы.
Дзевяностагадовая гаспадыня гэтага падворка літаральна тры тыдні таму адышла ў іншы свет.
– Мама яшчэ паспела парадавацца, як мы добраўпарадкавалі сядзібу, – гаворыць яе дачка Наталля Купрыянава. – А гэтага ўсяго яна мабыць, не перажыла б…
Наталля частуе мяне духмянымі сакавітымі грушамі з дрэва, якое не пашкадаваў ураган.
– Яго знявечыла так, што нават няма чаго ўзяць, каб прывіць, – кажа яна. – Атрымліваецца, што больш не будзе маміных ігруш…
Паводле папярэдніх звестак раённага аддзела па надзвычайных сітуацыях, стыхія прынесла разбурэнні на 15 падворкаў у Шасціснопах. Учора ратавальнікі ацэньвалі памеры страт. Таксама з мясцовымі жыхарамі сустрэліся выконваючая абавязкі старшыні Смілавіцкага сельвыканкама Ірына Марціновіч і дырэктар прадстаўніцтва Белдзяржстраха па Чэрвеньскаму раёну Анатоль Ульянаў. Яны распавялі людзям аб парадку аказання дапамогі і страхавых выплат.
Ігар АДАМОВІЧ. Фота аўтара
Карта сайта