Супрацоўнікі Чэрвеньскага раёна газазабеспячэння філіяла ПУ «Слуцкгаз» паспяхова спраўляюцца з ускладзенай на іх задачай - забяспечваюць бесперабойную і безаварыйную дастаўку прыроднага і звадкаванага газу спажыўцам. Колькасць іх расце з года ў год. У параўнанні з мінулым годам колькасць карыстальнікаў прыроднага газу павялічылася на 294 і склала 7859 абанентаў; звадкаванага газу - на 12 і склала 6215 домаўладанняў. Павялічваецца і колькасць населеных пунктаў, куды прыйшло «блакітнае паліва». У гэтым годзе да карыстальнікаў прыроднага газу дадаліся і жыхары вёскі Хвоеншчына.
У калектыве працуе 67 чалавек і кожны імкнецца якасна выконваць свае абавязкі, у многіх з іх стаж на прадпрыемстве больш за 15-20 гадоў.
За добрасумленную працу ў сферы газавай прамысловасці да свята узнагароджаны шэраг супрацоўнікаў: кіроўцу службы эксплуатацыі Вячаславу Грышанаву прысвоена званне «Ганаровы работнік газавай І паліўнай прамысловасці» з уручэннем адпаведнага нагруднага знака; слесару Андрэю Цахановічу аб'яўлена Падзяка УП «Мінскаблгаз»; прыёмшчыку заказаў Таццяне Дзямідка ўручана Ганаровая грамата ПУ «Слуцкгаз»; кіроўцу аварыйна-дыспетчарскай службы Леаніду Паграбенка ўручана Ганаровая грамата УП «Мінскаблгаз»; слесару Уладзіміру Свірыдовічу обявлена Удзячнасць і ўручана Ганаровая грамата ДВА «Белпалівагаз» (на здымку) і падсобнаму рабочаму Аляксандру Корыку ўручана Ганаровая грамата ПУ «Слуцкгаз».
Не забываюць ў калектыве ветэранаў. Да прафесійнага свята 16 чалавек кіраўніцтва ПУ «Слуцкгаз» ўзнагародзіла грашовымi прэміямі.
Не адстаюць ад прафесіяналаў маладыя работнікі: слесары Аляксей Ярашэвіч, Мікіта Бабіч і Андрэй Шэпелеў.
- Я ўдзячны свайму калектыву за добрасумленную працу, - адзначыў начальнік Чэрвеньскага раёна газазабеспячэння філіяла ПУ «Слуцкгаз» Рыгор Варанько. - Віншую калектыў з прафесійным святам. Жадаю здароўя, шчасця, сямейнага дабрабыту і поспехаў у працы.
Таццяна Марцьянава. Фота аўтара
Карта сайта