Гэту ідэю пастараліся данесці да гледачоў арганізатары і ўдзельнікі традыцыйнага каляднага дабрачыннага канцэрта, які адбыўся ў раённым Цэнтры культуры і вольнага часу.
Удзельнікі святочнага мерапрыемства, меўшага назву «Падары сабе радасць Раства», падзяліліся сваім святочным настроем з усімі прысутнымі ў зале.
Святлом сваіх сэрцаў, цудоўнымі галасамі і праніклівым выкананнем парадавалі гледачоў салісты Аляксандра МАКОЛЬСКАЯ, Андрэй ХУРСЕВIЧ, Дзмітрый МАРКЕВІЧ і Вераніка ПТАШНІК, вакальная група «Салавейка», студыя танца «Матрыкса».
Да іх далучыліся самыя юныя артысты, выхаванцы нядзельнай школы храма Свяціцеля Мікалая Цудатворца Лера Баравік, Арына Краснагір, Маргарыта Кавалевіч, Лізавета і Паліна Гоман. У канцы мерапрыемства дзеці, якія ўдзельнічалі ў канцэрце, пад бурныя апладысменты гледачоў атрымалі салодкія падарункі ад індывідуальнага прадпрымальніка Марыны Захаранкі. Арганізатары мерапрыемства дзякуюць Марыне Мікалаеўне за яе клопат аб маленькіх артыстах.
З віншавальнай прамовай выступіў настаяцель храма Свяціцеля Мікалая Цудатворца протаіерэй Аляксандр ЛАЗОЎСКІ.
Святар сказаў: «Гасподзь явіў сябе нам у гэты дзень у выглядзе маленькага безабароннага немаўляцi, але ў ім была вышэйшая сіла - пакора і любоў. І ён заклікае нас пайсці гэтым жа шляхам. Бо зло не перамагчы злом, яго можна выкараніць толькі дабром. Але для гэтага мы павінны духоўна папрацаваць, каб знайсці ў сабе і захаваць гэтую часцінку дабра, любові і веры. Жадаю каб у сэрцы кожнага з нас была Калядная радасць! Са святам, з Раством Хрыстовым, захоўвай вас усіх Гасподзь!».
Госцем канцэртнай праграмы стаў лаўрэат міжнародных конкурсаў, стыпендыят фонду Прэзідэнта Рэспублікі Беларусь па падтрымцы таленавітай моладзі Антон Карчэўскі.
У фае танцавальнай залы для ўсіх гледачоў і гасцей мерапрыемства парадавала выстава-продаж калядных сувеніраў «Гарадок навагодніх жаданняў».
Вольга ЛАЎНІКОВІЧ. Фота аўтара
Карта сайта