31 студзеня ўпершыню за шмат месяцаў юныя беларускія знаўцы сабраліся на вялікі і значны турнір. Галоўны натхняльнік і арганізатар «Альпійскіх гульняў» - лідар Мазырскага інтэлектуальнага руху «Міг» Расціслаў Міневіч.
Турнір праводзяцца ўжо не першы год, у 2021-м годзе прайшоў у анлайн фармаце, доўжыўся шэсць гадзін. Гульні турніру былі класічнымі: «Медыйка», «Свая гульня» і «ШДК».
Удзельнічалі каманды не толькі з Беларусі. Баранавічы, Віцебск, Харкаў, Кобрын, Мінск, Полацк, Пінск, Магілёў, Брэст, Салігорск, Маладзечна, Мазыр, Ліда, Гомель, Жлобін, а таксама Чэрвень, Смалявічы, Лагойск, Жодзіна, Гарадок і Альхоўка — геаграфія гульняў была шырокая.
З Чэрвеня, Лагойска і Смалявічаў было па дзве каманды, плюс зборная Чэрвеня і Лагойска «Тыльтонскі ордэн». Наш горад прадстаўлялі «Ярмала» і «Дзеці Еці».
Шчасце атрымаць дыпломы з Мазыра ўсміхнулася двум Смалявіцкім камандам, якія гулялі на чэрвеньскай пляцоўцы. Гэта «Чыкіпаў» і «Асгардыя». Яны ўвайшлі ў прызавую тройку «Медыя-гульні», заняўшы адпаведна 3 і 2 месца. «Тыльтонскі ордэн» увайшоў у дзесятку «ШДК», пакінуўшы ззаду 98 каманд. Па выніках трох гульняў турніру на чэрвеньскай пляцоўцы «Альпійскіх гульняў» першае месца ў «Чыкіпаў», другое ў «Тыльтонскага ордэна», трэцяе - у «Хамячкоў» з Лагойска.
Як адзначыла кіраўнік раённага клуба інтэлектуальных гульняў «Ігумен» Ірына Вабішчэвіч, чэрвенскiя знаўцы і арганізатары спадзяюцца, што гэта быў не апошні «міжсабойчык» трох дружалюбных раёнаў: «Чакаем, што наступнае запрашэнне на анлайн-пляцоўку — за Смалявічамі».
Наталля КАРАЛЬКЕВІЧ. Фота Ірыны Вабішчэвіч
Карта сайта