У адпаведнасці з патрабаваннямі гэтых праграм работнікі тэрытарыяльнага цэнтра сацыяльнага абслугоўвання абследуюць умовы пражывання ветэранаў вайны і працы, адзінокіх і адзінока пражываючых пажылых людзей і інвалідаў.
У аддзяленні першаснага прыёму, аналізу, інфармавання і прагназавання цэнтра збіраюць інфармацыю пра людзей, якія адносяцца да катэгорыі сацыяльна ўразлівых. Аб арганізацыі работы па забеспячэнні бяспечных умоў пражывання такіх грамадзян пагутарылі з загадчыкам аддзялення першаснага прыёму Максімам Русецкім.
- Максім Аляксандравіч, як у цэнтры сацыяльнага абслугоўвання даведаюцца пра тых, каму неабходная дапамога?
— У цэнтры існуе гадамі напрацаваная база, дзе ёсць звесткі практычна аб усіх сацыяльна неабароненых катэгорыях грамадзян, якая пастаянна падтрымліваецца ў актуальным стане. Акрамя гэтага звесткі паступаюць ад сельвыканкамаў, аддзела ўнутраных спраў, надзвычайных сітуацый, ЦРБ, упраўлення адукацыі. Штогод праводзяцца абследаваннi па месцы пражывання грамадзян, каб выявіць праблемы, з якімі яны сутыкаюцца, і аказаць дапамогу ў іх вырашэнні. Калі ў пажылога чалавека ёсць дзеці або іншыя сваякі, мы адпраўляем ім лісты з просьбай паклапаціцца аб родным чалавеку. У мінулым 2020 годзе ад імя цэнтра сацабслугоўвання адпраўлена 13 такіх лістоў. Калі чалавек зусім адзінокі, адпраўляем лісты ў арганізацыі, адкуль ён сыходзіў на пенсію.
-Як потым ажыццяўляеце дапамогу жывучым у нястачы, адзінокім грамадзянам?
- Па выніках абследаванняў за кошт мясцовага бюджэту ў 2020 годзе аказана дапамога 33 адзінокім грамадзянам на суму 7 тысяч 250 рублёў: у 9 домаўладаннях быў праведзены рамонт электраправодкі, у 10 - устаноўлены аўтаномныя пажарныя апавяшчальнікі, 1 домаўладанне абсталявана сігнальна-гукавой прыладай, у 13 былі заменены элементы харчавання ў АПА. Дапамога з Фонду сацыяльнай абароны насельніцтва была аказана 13 грамадзянам на агульную суму 1450 рублёў. За кошт гэтых сродкаў у домаўладаннях сацыяльна ўразлівых катэгорый грамадзян праведзены: рамонт пячнога ацяплення - у 7, рамонт электраправодкі - у 5 домаўладаннях. У адным домаўладанні пажылога чалавека быў праведзены рамонт пячнога ацяплення за кошт дзяржаўнай адраснай дапамогі на суму 2350 руб. На пачатак 2021 года ўжо складзены план-графік правядзення аналагічных работ у адзінокіх грамадзян. Рамонт печаў будзе праведзены ў 3 домаўладаннях, у 12 - рамонт электраправодкі, у 23 жылых памяшканнях будзе ўсталяваны АПА. Пры выяўленні ў ходзе правядзення абследаванняў новых праблем у частцы забеспячэння бяспечных умоў пражывання ў дадзены план-графік могуць уносіцца змены і дапаўненні.
- Калі ў пажылога чалавека праблемы іншага характару: дзеці жывуць далёка, у іншай краіне, ці крыўдзяць дзеткі, якія жывуць побач?
- Пажылыя грамадзяне, у якіх ёсць дзеці, але яны жывуць далёка ад бацькоў, ставяцца да катэгорыі самотна пражываючых. Яны або іх дзеці могуць звярнуцца ў цэнтр і папрасіць дапамогі сацыяльнага работніка. Пры абследаванні ўмоў жыцця людзей, якія адносяцца да сацыяльна ўразлівых катэгорый, а гэта не толькі адзінокія, але і пажылыя грамадзяне, якія падвяргаюцца гвалту, псіхалагічнаму прэсінгу з боку сумесна пражываючых, работнікі цэнтра прапануюць часовае, пакуль не вырашыцца праблема, пражыванне ў крызісным пакоі. Сацыяльныя работнікі абавязкова звяртаюць увагу пажылых грамадзян на хітрыкі і прыдумкі ашуканцаў, якія могуць выдаваць сябе за прадстаўнікоў розных службаў.
- Якія паслугі, у тым ліку платныя, прапануе насельніцтву тэрытарыяльны цэнтр сацыяльнага абслугоўвання?
- Наведваючы домаўладаннi ў населеных пунктах раёна, мы інфармуем грамадзян аб усіх паслугах цэнтра, у тым ліку платных. Гэта - гаспадарча-бытавыя, паслугі пагадзіннага сыходу (сядзелкі) за тымі, хто страціў здольнасць да самаабслугоўвання. Паслуга дзённага нагляду ў аддзяленні забеспячэння дзённага знаходжання – бясплатная. У аддзяленні працуюць розныя гурткі і клубы па інтарэсах. Кожны чалавек знойдзе тут занятак па душы.
Для тых, хто па якіх-небудзь прычынах не можа жыць самастойна, у тэрытарыяльным цэнтры створана аддзяленне кругласутачнага знаходжання. Тэрмін знаходжання ў гэтым аддзяленні не абмежаваны. Для інвалідаў і адзінокіх людзей гэтая паслуга - бясплатная.
Для грамадзян, якія маюць дзяцей, якія абавязаны дапамагаць і ўтрымліваць састарэлых бацькоў па законе, пры наяўнасці свабодных месцаў ва ўстанове кругласутачнага знаходжання таксама магчыма пражыванне, але толькі на платнай аснове. Па сённяшніх цэнах, гэта прыкладна 700 рублёў у месяц. Для працуючых дарослых дзяцей - гэта выхад. Але толькі пры наяўнасці свабодных месцаў. У аддзяленні кругласутачнага знаходжання цэнтра ў аграгарадку Рудня на сённяшні дзень свабодных месцаў няма.
Больш за ўсё пажылымі людзьмі запатрабавана сацыяльнае абслугоўванне дома. Пра гэта гавораць і лічбы: 640 пажылых грамадзян і інвалідаў карыстаюцца гэтай паслугай сёння, у асноўным сельскія жыхары. 52 сацыяльныя работнікі купляюць прадукты і дапамагаюць ім па гаспадарцы. Гэта таксама платная паслуга. Кошт яе залежыць ад колькасці наведванняў сацыяльнага работніка ў тыдзень: 3, 4 або 5 разоў. Сума па выніках месяца, як правіла, не перавышае трыццаці рублёў.
- Максім Аляксандравіч, ці ёсць нейкія прылады, якія дапамагаюць блізкім людзям быць у курсе перамяшчэння, самаадчування іх састарэлых сваякоў?
- У мэтах мінімізацыі прычын і ўмоў, якія спрыяюць гібелі састарэлых грамадзян і інвалідаў ад знешніх прычын, створаны тэхнічныя прылады ў выглядзе наручных гадзіннiкаў, бранзалетаў, прылады персанальнай сігналізацыі «Лінія жыцця-24» - гэта кулон-тэлефон для выкарыстання ў любой сітуацыі: падзенне, дрэннае самаадчуванне, страта арыентацыі ў прасторы. У двух гандлёвых сетках: «5 элемент», «Электрасіла» ў продажы маюцца разумныя гадзіннiкi маркі «Каньён», з дапамогай якіх можна адсачыць перамяшчэнне чалавека, адправіць сігнал SOS або галасавое паведамленне. Сучасныя гаджэты дапамагаюць ратаваць жыцці.
Гутарыла Галіна Гамеза. Фота аўтара
Карта сайта