Сімвалічна, што гэтая адметная падзея адбылася ў Міжнародны дзень абароны дзяцей.
Уручаючы хатняй гаспадыні Юліі Буглак і паляводу СВФ “Аграбуд” ААТ “Мінскжалезабетон” Наталлі Латушкінай ордэны Маці, якімі яны адзначаны Указам Прэзідэнта Рэспублікі Беларусь за нараджэнне і выхаванне пяці і больш дзяцей, старшыня райвыканкама Віталь Казлоў адзначыў, што гэтыя ўзнагароды сімвалізуюць высокае дзяржаўнае і грамадскае прызнанне маці. Яны – знак глыбокай павагі і шанавання ролі жанчыны ў грамадстве.
Віталь Казлоў выказаў Юліі Вітальеўне і Наталлі Уладзіміраўне шчырую ўдзячнасць за сапраўдны подзвіг, пажадаў ім і іх дзецям моцнага здароўя і дабрабыту. Ён таксама адзначыў, што раённыя ўлады робяць усё магчымае для падтрымкі шматдзетных сем’яў і пры неабходнасці гатовыя падставіць ім сваё плячо.
На ўрачыстасць жанчыны прыйшлі разам з мужамі і дзецьмі. Ва ўтульнай абстаноўцы канферэнц-залы сем’і пагутарылі са старшынёй райвыканкама, распавялі пра свае набыткі і праблемы, абмяняліся думкамі.
У прыватнасці, Сяргей Буглак падзякаваў Віталю Казлову за дапамогу ў вырашэнні праблемы прыватызацыі жылога дома. Ён таксама выказаў захапленне тым, як змянілася за апошнія гады аблічча Чэрвеня. А Андрэй Латушкін папрасіў пасадзейнічаць у рамонце дарогі да новага дома, у які іх шматдзетная сям’я неўзабаве заселіцца.
Напрыканцы Віталь Казлоў падараваў Юліі Буглак і Наталлі Латушкінай альбомы для сямейных фотаздымкаў, а іх дзеці атрымалі мяккія цацкі ад раённай арганізацыі Беларускага саюза жанчын. Завяршылася ўрачыстасць экскурсіяй па экспазіцыях краязнаўчага музея.
Карта сайта