Начальнік упраўлення Алена Калтовіч адзначыла, што пытанні аховы працы і бяспечнага знаходжання работнікаў на вытворчых участках застаюцца вострымі і актуальнымі. Нягледзячы на шматлікія інструктажы і прафілактычныя гутаркі, траўматызм і гібель людзей на вытворчасці адбываюцца ў нашым раёне штогод.
Пра стан вытворчага траўматызму з цяжкімі наступствамі ў арганізацыях Мінскай вобласці і Чэрвеньскага раёна расказала галоўны спецыяліст упраўлення Алена Кацько:
- У рэспубліцы за першае паўгоддзе 2021 года на вытворчасці пацярпела больш за 850 працаўнікоў, з іх цяжка траўмаваны 320 чалавек, больш за 50 загінулі. У Мінскай вобласці больш за 70 чалавек атрымалі траўмы, пяцёра з іх знаходзіліся ў стане алкагольнага ап'янення.
У Чэрвеньскім раёне з пачатку года загінулі тры работнікі. Смяротныя выпадкі адбыліся ў сельгаспрадпрыемстве «Валевачы», Чэрвеньскім лясгасе і філіяле «ДРБУ-121». Асноўная прычына - парушэнне правілаў аховы працы.
- Сярэдні ўзрост загінуўшых - 47 гадоў. Здавалася б, не пачаткоўцы, а людзі, якія маюць вопыт, умудроныя жыццём, але па ўласнай легкадумнасці, у большасці выпадкаў, грэбуючы правіламі аховы працы і бяспекі, - пракаментавала Алена Кацько.
Старшыня Чэрвеньскага раённага аб'яднання прафсаюзаў Вольга Коцiна распавяла аб канцэпцыі «нулявога траўматызму», якая ўключае ў сябе сем залатых правілаў: стаць лідэрам - паказаць прыхільнасць прынцыпам; выяўляць пагрозы - кантраляваць рызыкі; вызначаць мэты - распрацоўваць праграмы; стварыць сістэму бяспекі і гігіены працы - дасягнуць высокага ўзроўню арганізацыі; забяспечваць бяспеку і гігіену на працоўных месцах, пры працы са станкамі і абсталяваннем; павышаць кваліфікацыю - развіваць прафесійныя навыкі; інвеставаць у кадры - матываваць праз удзел.
- Няшчасныя выпадкі на вытворчасці і прафесійныя захворваннi не перадвызначаны лёсам і не з'яўляюцца непазбежнымі: у іх заўсёды ёсць прычыны. - адзначыла Вольга Коцiна. Развіццё эфектыўнай культуры прафілактыкі дазваляе іх ліквідаваць, прадухіліць вытворчыя аварыі і матэрыяльную шкоду.
У канцы семінара ўдзельнікі запоўнілі анкеты для далейшага аналізу стану аховы працы на прадпрыемствах.
Галіна Гамеза. Фота аўтара
Карта сайта