Дваццаць пяць гадоў таму тут упершыню прагучаў званок, які збірае на ўрок не проста школьнікаў, а хлопцаў, горда носячых званне гімназістаў. А сёння права даць першы сімвалічны званок навучальнага года атрымала ўнучка першага дырэктара гімназіі, Яўгена Адуцкевіча.
Пакуль вучань выпускнога класа беражліва нёс на руках маленькую першаклашачку, якае давала званок, многія настаўнікі з павагай і падзякай успомнілі светлы вобраз свайго калегі, сапраўднага Педагога, любімага настаўніка многіх хлопцаў, якія пайшлі па яго слядах і якія абралі геаграфію як аснову прафесіі.
Апладысментамі і ўсмешкамі ўрачыстая лінейка сустракала пачаткоўцаў гімназіі - сёлета ў першы клас прыйшлі 26 няўрымслівых, смешных і дапытлівых дзетак.
З самага пачатку яны заявілі пра сябе: чыталі вершы, танцавалі, літаральна завалілі сваю настаўніцу кветкамі, а ў падарунак кожны атрымаў кнігу «Беларусь - наша Радзіма».
Парадаваў прысутных на лінейцы і адзінаццаты клас.
Яны прыйшлі ў адзінай форме, якую прыдумалі сабе самі – у дзяўчынак былі белыя блузкі і далікатна-бэзавыя спадніцы, а ў хлапчукоў да іх стыльнай дзелавой вопраткi – бэзавыя матылькі. Выпускнікі падарылі гледачам танцавальны флэш-моб, не забыліся яны і пра прыгожы букет для дырэктара.
На фоне яркага і святочнага «грамадзянскага» адзення ўдзельнікаў мерапрыемства строгай выразнасцю вылучалася форма гасцей-афіцэраў.
На лінейку прыехалі намеснік начальніка РАНС Аляксей Батура, ваенны камісар Дзмітрый Сініцкі, старшыня раённай арганізацыі Беларускага саюза афіцэраў Станіслаў Альшэўскі і камандзір 36-й дарожна-маставой брыгады транспартных войскаў Міністэрства абароны Тахір Махмудаў. Выступаючы перад удзельнікамі ўрачыстай лінейкі, палкоўнік Махмудаў пажадаў гімназістам добра вучыцца, расці годнымі грамадзянамі і патрыётамі сваёй Беларусі.
Як і ў кожнай беларускай школе, сённяшні першы дзень заняткаў быў прысвечаны Году народнага адзінства. Аб патрыятызме і ўменні абараняць суверэнітэт сваёй краіны і яе народ, аб прыхільнасці беларусаў да міру і спакою, аб вялікай цане, якую заплацілі за гэта нашы дзяды і прадзеды, афіцэры гаварылі са старшакласнікамі на ўроку мужнасці. Сустрэчу з дзевяці- і дзесяцікласнікамі правялі Дзмітрый Сініцкі, Тахір Махмудаў і Станіслаў Альшэўскі. Станіслаў Адамовіч быў прадстаўлены старшакласнікам як новы выкладчык гімназіі - падпалкоўнік у адстаўцы будзе ў якасці кіраўніка па ваенна-патрыятычным выхаванні весці ў хлопцаў прадмет «Дапрызыўная і медыцынская падрыхтоўка».
...Па заканчэнні ўрачыстай лінейкі адзінаццацікласнікі асабіста малых адвялі за ручку ў іх утульны першы клас.
Колькі адкрыццяў, выдатных і важных, трэба будзе зрабіць гэтым мілым хлопчыкам і дзяўчынкам! Колькі добрага яны даведаюцца ад сваіх настаўнікаў, як шмат будзе ў іх перамог і дасягненняў, якой прыгожай будзе іх школьная дружба і якімі яны будуць прыгожымі і дарослымі на сваім выпускным балі! А пакуль – вучыцеся, малыя, цешце бацькоў і вырастайце людзьмі. Што, зрэшты, можна пажадаць і ўсім астатнім вучням.
Наталля КАРАЛЬКЕВІЧ. Фота аўтара
Карта сайта