Як распавяла аграном-насеннявод гаспадаркі Марына Кудланс, сёлета тут вырошчвалі 13 гатункаў бульбы. Сярод іх – тры новыя, нямецкай селекцыі: “Лілі”, “Бельмонда” і “Апал”. Іх набылі, каб размножыць. Напрыклад, пашыраная вытворчасць клубняў гатунку “Апал”, які выкарыстоўваецца для вырабу чыпсаў, у перспектыве дасць магчымасць асвоіць новы рынак збыту.
– Сёлетні год – не вельмі спрыяльны для бульбы: у перыяд фарміравання клубняў яна трапіла пад засуху, – гаворыць Марына Кудланс. – Тым не менш нават у такіх умовах, за кошт строгага выканання тэхналагічных патрабаванняў да вырошчвання ўраджай у нас неблагі. У прыватнасці, гатунак “Гала”, які ўбіраем зараз, дае больш за 300 цэнтнераў з гектара. Таксама маем надзею на гатункі “Радрыга”, “Рыўера”, “Першацвет”, “Брыз”…
На ўборцы бульбы ў гаспадарцы задзейнічаюць чатыры камбайны ў счэпцы з трактарамі, на якіх працуюць механізатары Андрэй Тарасік, Ілля Бабіч, Андрэй Ігнатовіч і Андрэй Гамеза. Адвозяць клубні з поля 7-8 аўтамашын. Балазе, бульбасховішча побач: пераважная большасць палеткаў – не далей за тры кіламетры ад яго.
Ігар АДАМОВІЧ
Карта сайта