Напярэдадні акцыі члены клуба ЮНЕСКА «Факел» і старшакласнікі праводзілі сустрэчы са школьнікамі рознага ўзросту, дзе распавядалі ім пра тое, што кожны чалавек можа ўнесці ўклад у агульную справу захавання лясоў, экалогіі і натуральнай прыгажосці нашай планеты.
На працягу двух тыдняў неабыякавыя хлопцы прыносілі ў школу скрынкі і звязкі з выкарыстанай паперай, старымі сшыткамі і газетамі. Каб вырвацца ў лідары, школьнікі абыходзілі сваякоў, суседзяў, арганізацыі і гандлёвыя кропкі, дзе з імі ахвотна дзяліліся непатрэбнай папяровай прадукцыяй.
У холе першага паверха школы ўсталявалі макет дрэва, на якім кожны клас пазначылі папяровым лістом дрэва. Колькасць сабранай макулатуры адзначалі папяровымі гірамі з указаннем вагі. Кожны школьнік мог паглядзець і ацаніць, які клас лідзіруе і разумеў: трэба «падцягнуцца», дагнаць і абагнаць.
- У акцыі ўдзельнічалі ўсе класы. Ужо за першую чвэрць мы выканалі гадавую норму па зборы макулатуры – з гонарам падзяліўся старшыня клуба ЮНЕСКА «Факел» Станіслаў Лапатко. - Мы будзем працягваць збор. Гэта акцыя - прамежкавыя вынікі. Наша мэта - прастымуляваць хлопцаў на далейшы ўдзел у зборы другаснай папяровай сыравіны. А таксама адзначыць і ўзнагародзіць самых актыўных удзельнікаў.
Вынікі «папяровага буму» падлічаны. Удзельнікам акцыі ўдалося сабраць 1 тону 348 кілаграм папяровай другаснай сыравіны, якая атрымае другое жыццё.
- Абсалютнымі пераможцамі прызнаны навучэнцы 8-га класа - абвясціла вынікі на ўрачыстай лінейцы дырэктар школы Віялета Аўсяннікава. - Мы віншуем пераможцаў і дзякуем за ўдзел усім вучням. У такіх мерапрыемствах важны ўклад кожнага. Гэта вучыць дзяцей беражліва ставіцца да прыродных матэрыялаў і рэсурсаў, у тым ліку і паперы. У пераліку на звыклыя нам аналогіі, сваім удзелам у акцыі нашы дзеці выратавалі ад высечкі 26 вялікіх і маленькіх дрэў.
Галіна АКБАЛ.
Карта сайта