Чэрвеньскі раённы выканаўчы камітэт

Па традыцыі, да гэтага дня выхаванцы школы падрыхтавалі невялікі канцэрт.

Паколькі цяперашняе прысвячэнне правялі не ў пачатку навучальнага года, а ў канцы, то навічкі, якія паспелі ўжо чамусцi навучыцца, выступалі самі, заслугоўваючы апладысменты і воклічы «Брава!» ад гледачоў.

Упершыню за доўгі час у школе арганізаваны хор. Ён і адкрыў мерапрыемства прыгожай песняй «Арэлі» з фільма аб прыгодах Электроніка. Выконваліся і іншыя творы з мілых старых дзіцячых стужак, напрыклад, Улад Дзямідко сыграў на раялі «Песню Ката Леапольда».

Тэатральнае аддзяленне падрыхтавала некалькі нумароў, выступалі і гуртом, і індывідуальна. Кірыл Шумко вывучыў вялікі і вясёлы верш пра трох сяброў, якія прыдумалі не вельмі ўдалы жарт, які скончыўся сіняком пад вокам.

Вясёлы танец «Фарбы» падарылі гледачам самыя маленькія навучэнцы харэаграфічнага аддзялення. Валерыя Брыкач і Даша Драбіцько вельмі стараліся заваяваць залу сваім вакальным мастацтвам.

Са Станіславам Гатоўка многія чытачы ўжо знаёмыя, як з пачынаючым майстрам вырабаў і ДПМ. А вось у Школе мастацтваў ён вучыцца ігры на духавых інструментах.

Пасля канцэрта ўсім хлопцам, якія сёлета паступілі ў Школу мастацтваў, яе дырэктар Галіна Прышывалка ўручыла Дыпломы першакласніка і невялікія салодкія падарункі, каб зрабіць прыемнымі нават тыя моманты, калі не бярэцца нота ці не запамінаецца танцавальнае па. Усё атрымаецца! Да сустрэчы на ​​вялікіх мерапрыемствах!

Наталля КАРАЛЬКЕВІЧ. Фота аўтара