7 мая на татамі Мінскай лігі выйшлі выхаванцы клуба «Легенды каратэ» Данііл Буглак, Юра Гаўрыльчык, Дзяніс Лобан, Надзя Лобан і Ягор Шылай. Дзяніс і Юра ужо ўдзельнічалі ў этапах Лігі, Данііл увогуле ўдзельнічае другі сезон. А вось для Ягора і Надзі гэта быў першы турнір у Лізе. Вынік выступлення нашых каратыстаў — тры залатыя (Данііл Буглак, Юра Гаўрыльчык, Надзя Лобан) і два бронзавыя (Дзяніс Лобан, Ягор Шылай) медалі. Акрамя таго, па выніках усіх пяці этапаў Лігі Данііл Буглак і Дзяніс Лобан занялі другія месцы ў агульным заліку.
Апошні этап лігі атрымаўся самым цяжкім, бо за плячыма быў год упартых трэніровак і школьных заняткаў і стомленасць адчувалася ў вачах рабят, бо яны ўсё чакаюць канікул! Але ўсе сабралі волю ў кулак і паказалі сапраўдны байцоўскі характар.
У катэгорыі «ката дзяўчыны 6-7 гадоў» Надзе Лобан удалося ў першым крузе «выбіць» фаварытку турніру, чым адразу ж забяспечыць сабе месца ў фінале.
Калі ў першым крузе катэгорыі «ката хлопчыкі 6 гадоў» выступіў Юра Гаўрыльчык, то ўсім стала зразумела, хто лепшы!
Сур'ёзная барацьба за медалі ўзнікла ў самай шматлікай катэгорыі «ката хлопчыкі 7 гадоў», дзе выступалі два сябра і аднакласніка, Дзяніс Лобан і Ягор Шылай.
І завяршаў выступленне чэрвеньскай каманды на турніры Данііл Буглак у катэгорыі «ката хлопчыкі 9 гадоў». У сваёй катэгорыі Данік выканаў два сваіх любімых ката і выйграў.
Усіх рабят віншуем з выступам і жадаем новых поспехаў! Усе свае перамогі дзеці прысвяцілі Дню Перамогі на славу сваіх прадзедаў, якія ваявалі на франтах Вялікай Айчыннай і падарылі нам магчымасць жыць, трэніравацца і ўдзельнічаць у спаборніцтвах.
Сяргей БУГЛАК. Фота аўтара
Карта сайта