Кожны дзень атрымаўся цікавым, насычаным падзеямі, карысным. Але самым запамінальным і незвычайным быў чацвер — “Дзень роднай мовы”. На сустрэчу з выхаванцамі прыйшоў паэт і пісьменнік Генадзь Аўласенка. Ён прынёс свае кнігі, якія напісаў для дзяцей. Сярод іх — аповесць-казка “Ветрык і крысіны кароль”, казачная аповесць “Снегавік і вясна”, Малпачка”, зборнік “Зайка польку танцаваў” і іншыя.
Калі аўтар чытаў свае творы, у тым ліку і жартоўныя, загадваў загадкі, нашы выхаванцы з здавальненнем слухалі і адгадвалі. Нездарма Генадзь Пятровіч працаваў у школе настаўнікам. Ён здолеў так распавесці пра сваю творчасць, засяродзіць іх увагу, што слухалі яго на адным подыху і з увагай. Ён умела спалучыў свой расповед з фізкультхвілінкамі і пальчыкавай гімнастыкай. Усе дзеці дружна выконвалі дзеянні, рухаліся, пляскалі ў далоні, тупалі нагамі і падскоквалі, паўтараючы нескладаныя рыфмаваныя радкі. Актыўнасць дзяцей была вялікай, таму што было вельмі цікава. Асабліва спадабаліся ім гумарыстычныя загадкі, небыліцы і перакруты. Яшчэ дзеці даведаліся, што Генадзь Аўласенка піша фантастыку для дарослых.
Напрыканцы сустрэчы Генадзь Пятровіч падараваў выхаванцам адну са сваіх апошніх аповесцей “Снегавік і вясна”. І, канешне, мы зрабілі сумеснае фота на памяць.
На гэтым стасункі з цікавым чалавекам не скончыліся. Мы запрасілі Генадзя Аўласенку згуляць з нашымі выхаванцамі ў шашкі. Ён адразу згадзіўся, бо, па яго словах, быў неаднаразовым чэмпіёнам па шашках яшчэ ў школе. І сапраўды, перамагчы яго не атрымалася нікому: ні лепшаму нашаму іграку — Ульяне, ні педагогам.
Вось такі ён, Генадзь Аўласенка – камунікабельны, таленавіты, працавіты, вясёлы, з добрым пачуццём гумару і ўменнем наладзіць добразычлівыя адносіны з дзецьмі. А галоўнае – сапраўдны беларус, патрыёт сваёй Радзімы, добра валодае роднай мовай, які за кароткі час здолеў “запаліць” у сэрцы кожнага прысутнага на сустрэчы часцінку цеплыні і павагі да роднай мовы.
Жанна БАРНАВІЦКАЯ,намеснік загадчыка ясляў-сада №1 г.Чэрвеня.
Фота аўтара
Карта сайта