«Беларускі міжнародны медыяфорум - знакавая падзея ў грамадска-палітычным жыцці краіны. Адна з яго мэт - канцэнтрацыя намаганняў міжнароднай медыясупольнасці на выпрацоўку пазітыўных поглядаў на тое, што адбываецца ў Беларусі, на адкрытасць і чысціню нашай знешняй палітыкі, якая заснавана на прынцыпах добрасуседства, узаемаразумення, міру», - падкрэсліў намеснік кіраўніка Адміністрацыі Прэзідэнта Беларусі Уладзімір Жаўняк.
Упершыню гэты форум праводзіцца ў адным з рэгіёнаў Беларусі. Цяперашняй яго пляцоўкай абраны Брэст. «Гэта не выпадкова. Па-першае, бягучы год - год 75-годдзя вызвалення Беларусі ад нямецка-фашысцкіх захопнікаў. Па-другое, Брэст першым прыняў эстафету агню II Еўрапейскіх гульняў «Полымя мiру». Па-трэцяе, горад адзначае тысячагоддзе. Гэта магчымасць паказаць удзельнікам форуму (многія не першы раз прыехалі ў Беларусь) іншыя рэгіёны нашай краіны, - сказаў міністр інфармацыі Беларусі Аляксандр Карлюкевіч. - Праграма мерапрыемства насычаная. Пасля пленарнага пасяджэння будзе праца ў секцыях, панэльныя дыскусіі. Так ці інакш, яны ўсе звязаны з сацыяльнымі сеткамі, інтэрнэт-прасторай, благасферай. Больш за ўсё гутарак будзе пра сацыяльную адказнасць журналістаў, пра тое, як мы можам зрабіць свет лепш, што значыць наша прафесія сёння».
XIV Беларускі міжнародны медыяфорум сабраў больш за 250 дзяржаўных і грамадскіх дзеячаў, дыпламатаў, прадстаўнікоў экспертнай і медыйнай супольнасці, журналістаў з 25 краін. Удзельнікі сёння падыскутуюць аб медыяпрасторы і інфармацыйнай бяспецы, уплыве сацыяльных сетак і благасферы на фарміраванне грамадскай думкі, абмяркуюць сучасныя трэнды інтэрнэт-журналістыкі і яе ролю ў вырашэнні сацыяльна-палітычных праблем рэгіёнаў. 24 мая пройдзе круглы стол «Саюзная дзяржава: 20 гадоў у медыяпрасторы. Вынікі і перспектывы».
У гасцей мерапрыемства будзе магчымасць бліжэй пазнаёміцца з жыццём Брэста, яго славутасцямі. «Мы стараемся дыверсіфікаваць прывабнасць горада па розных напрамках, інвестыцыі ў яго вылічаюцца сотнямі мільёнаў даляраў. Мы хочам пазіцыянаваць Брэст як сучасны горад, развіццё якога ўвасабляе ў цэлым развіццё Беларусі», - дадаў старшыня Брэсцкага гарвыканкама Аляксандр Рагачук.
Арганізатарамі Беларускага міжнароднага медыяфоруму выступаюць Міністэрства інфармацыі, Пастаянны камітэт Саюзнай дзяржавы пры падтрымцы Брэсцкага абласнога выканаўчага камітэта, Міждзяржаўнага фонду па гуманітарным супрацоўніцтве дзяржаў - удзельніц СНД, МЗС Беларусі, Выканаўчага камітэта СНД, Беларускага саюза журналістаў.
Карта сайта