Эксперыментальная база “Натальеўск” сёлета мае самую вялікую ў раёне ўборачную плошчу азімага рапсу. Пасевы гэтай культуры тут пашырылі з 350 да 600 гектараў за кошт далучаных зямель сельгаспрадпрыемства “Ганута-Агра”.
– Вырошчваць больш рапсу для нас – жыццёвая неабходнасць, – распавядае галоўны аграном гаспадаркі Сяргей Бабіновіч. – Адыходы яго прамысловай перапрацоўкі – жмых – выкарыстоўваем як высокабялковы кампанент кармасумесі для дойнага статка.
На гануцкіх землях рапс ужо ўбралі. Ураджайнасць неблагая – больш за 20 цэнтнераў з гектара.
Увогуле гэтай культурай займацца выгадна. Нават з улікам высокіх выдаткаў на догляд за пасевамі рапс сябе акупляе. Сёння за тону алейнага насення даюць 800 рублёў. Гэта ў сярэднім ўдвая больш, чым закупачны кошт тоны збожжа. А яшчэ рапс – выдатны папярэднік для зерневых культур.
Камбайнавы экіпаж Андрэя Тарасіка і Аляксандра Шута
Усе рапсавыя палеткі мы засявалі адным гатункам – “Імперыял”. Гібрыдаў, якія лічацца больш ураджайнымі, не выкарыстоўваем, бо для гаспадаркі важна атрымаць не толькі вал, але яшчэ і неабходную колькасць якаснага насення, на вытворчасці якога, нароўні з зерневымі, мы спецыялізуемся…
Камбайнавы экіпаж Андрэя Гамезы і Сяргея Шайпака
На рапсавых палетках у “Натальеўску” шчыруюць шэсць камбайнавых экіпажаў. Пры ўборцы асаблівая ўвага надаецца якасці абмалоту. Перад выхадам у поле ўсе камбайны ўважліва праверылі на герметычнасць і ўстанавілі на іх адмысловыя прыстаўкі.
Вадзіцель на адвозцы алейнага насення Мікалай Савайтан
– Па арганізацыі работ, настрою камбайнераў праблем няма, – кажа Сяргей Бабіновіч. – Адзінае, што хвалюе – не дужа спрыяльнае надвор’е. На бліжэйшыя дні сіноптыкі прагназуюць дажджы. Таму давядзецца працаваць у прамежку паміж імі. Балазе рапс, у адрозненне ад зерневых, пасля дажджу прасыхае хутчэй.
Ігар АДАМОВІЧ. Фота аўтара
Карта сайта