Прадстаўнікі шасці першасных арганізацый работнікаў прафсаюза віталі гасцей канферэнцыі: старшыню раённага аб'яднання прафсаюзаў Вольгу Коцiну і галоўнага прававога інспектара Мінскай гарадской арганізацыі прафсаюза работнікаў культуры, інфармацыі, спорту і турызму Генадзя Апанасенка. У выніковым дакладзе старшыня раённай арганізацыі Алена Забаронак адзначыла, што галоўнымі напрамкамі работы арганізацыі за справаздачны перыяд былі: пытанні арганізацыі грамадскага кантролю за выкананнем патрабаванняў па ахове працы, прававая абарона работнікаў, правядзенне мерапрыемстваў па маладзёжнай палітыцы, па захаванню гістарычнай памяці, добраўпарадкаванні помнікаў і мемарыялаў. Члены раённай арганізацыі прафсаюза работнікаў культуры, інфармацыі, спорту і турызму - актыўныя ўдзельнікі ўсіх раённых і рэспубліканскіх акцый, марафонаў, суботнікаў, святочных і спартыўных мерапрыемстваў. Надаецца ўвага і аздараўленню працоўных і членаў іх сем'яў у прафсаюзных здраўніцах.
-Прафсаюзы сумесна з працоўнымі калектывамі сёння праводзяць работу па вельмі многіх напрамках, - сказала Алена Валер'еўна, - І мы з вамі абавязаны распавядаць людзям пра нашы справы, ініцыятывы, дасягненнi. Інфармацыйная праца - гэта фарміраванне нашага іміджу і аўтарытэту ў грамадстве.
Пасля выступу Алены Забаронак ўдзельнікі канферэнцыі заслухалі справаздачы старшыняў рэвізійнай і мандатнай камісій.
Новым старшынёй Чэрвенскай раённай арганізацыі прафсаюза работнікаў культуры, інфармацыі, спорту і турызму аднагалосна выбрана Валянціна Задзiрава, галоўны спецыяліст аддзела ідэалагічнай работы, культуры і па справах моладзі. Ва ўрачыстай абстаноўцы яна зачытала «Клятву прафсаюзнага лідэра».
Вольга Коцiна ўручыла грамату раённага аб'яднання прафсаюзаў за плённае супрацоўніцтва, ініцыятыву і шматгадовую плённую працу ў галіне культуры Алене Забаронак. Алена Валер'еўна адзначыла граматамі раённай арганізацыі актывістаў пярвічак.
Галіна Гамеза. Фота аўтара
Карта сайта