Усе запрошаныя - дэсантнікі, воіны-інтэрнацыяналісты, група юных матацыклістаў з ДТСААФ, ветэраны Вялікай Айчыннай вайны Мікалай Аляксандравіч Лашук і Акім Цітовіч Якаўлеў, спартсмены, аўтааматары - прынялі ўдзел у аўтапрабегу. Падчас яго ўсё везлі ў машынах сцягі брыгад ПДВ, беларускі сцяг і сцяг горада. Людзі на вуліцах Чэрвеня рэагавалі адразу і заўсёды станоўча: уладальнікі аўто сігналілі, пешаходы віталі, паказваючы «клас!». Відовішча сапраўды было ўнушальнае: шматлікія «афганцы» і былыя вайскоўцы надзелі форму, ветэраны - медалі, усе дэсантнікі былі ў цяльняшках, здалёку былі прыкметныя блакітныя берэты. Удзельнікі аўтапрабегу аб'ехалі ўсе помнікі, якія знаходзяцца ў межах горада, усклалі кветкі.
Заключным у маршруце быў мемарыяльны знак воінам-інтэрнацыяналістам Чэрвеньшчыны, якія загінулі ў Афганістане. Памяць дзесяці землякоў ўшанавалі хвілінай маўчання.
Затым у Школе мастацтваў быў арганізаваны канцэрт. Ваенны камісар Чэрвеньскага і Бярэзінскага раёнаў Дзмітрый Сініцкай ўручыў воінам-інтэрнацыяналістам памятныя медалі да 75-годдзя вызвалення Беларусі.
Мерапрыемства было амаль толькі мужчынскім, але атрымалася вельмі цёплым. Пасля канцэрта ніхто не разыходзіўся, ўспаміналі службу ў войску, баявыя дзеянні, камандзіраў, ваенныя аперацыі. Фатаграфаваліся. Спявалі песні. Смяяліся. Плакалі. У фантан ніхто не скакаў - неяк не да гэтага было.
Наталля КАРАЛЬКЕВІЧ. Фота аўтара
Карта сайта