Удзел у мерапрыемствах, якія пройдуць у Клецку і Нясвіжы, прымуць каля 50 чалавек з усіх абласцей і г. Мінска. Сярод іх прадстаўнікі Міністэрства адукацыі Рэспублікі Беларусь, спецыялісты галоўных упраўленняў па адукацыі аблвыканкамаў (камітэта па адукацыі Мінгарвыканкама), што займаюцца пытаннямі дадатковай адукацыі дзяцей і моладзі, дырэктары абласных (Мінскіх гарадскіх) шматпрофільных і аднапрофiльных ўстаноў дадатковай адукацыі дзяцей і моладзі.
Урачыстае адкрыццё тыдня адбудзецца у Клецкім раёне. Удзельнікам мерапрыемства будуць прадстаўлены інавацыйныя, творчыя даследчыя праекты, распрацоўкі ў галіне тэхнічнай творчасці, а таксама досвед працы аб'яднанняў па інтарэсах эколага-біялагічнага, турысцка-краязнаўчага, натуральна-матэматычнага профіляў устаноў дадатковай адукацыі Міншчыны.
У гэты ж дзень у Нясвіжы будзе прэзентаваная дзейнасць аб'яднанняў па інтарэсах мастацкага профілю. Тут пройдуць выставы і майстар-класы, будуць паказаны ініцыятывы, накіраваныя на арганізацыю вольнага часу дзяцей і моладзі, прапаганду здаровага ладу жыцця, папулярызацыю розных відаў спорту, выхаванне ў вучняў бяспечных паводзін, адраджэнне і захаванне культурна-гістарычнай спадчыны беларускага народа.
У рамках тыдня будуць прадстаўлены розныя напрамкі дзейнасці ўстаноў дадатковай адукацыі дзяцей і моладзі Міншчыны: традыцыйныя (саломапляценне, ткацтва, кераміка, выцінанка, маляванка, народная лялька), найбольш папулярныя (вырабы з фоамiрану і фетру, качанне, квiлiнг, карвiнг) і больш рэдкія - LEGO-канструяванне, робататэхніка, музейная арт-кафэ і інш.
Госці змогуць убачыць мадэлі калекцый дыпламантаў Рэспубліканскага фестывалю-конкурсу моды і фота «Млын моды», Рэспубліканскага агляд-конкурсу дзіцячай творчасці «Добры дзень, свет!». Перад гасцямі выступяць лепшыя мастацкія калектывы Міншчыны.
У мінулае нашай Радзімы іх захопяць паказальныя выступленні гістарычнага клуба «Баявая спадчына» ў музычным суправаджэнні гістарычнага ансамбля «Вір» з Цэнтра творчасці дзяцей і моладзі Барысаўскага раёна, майстар-класы па гістарычных танцах ад навучэнцаў Цэнтра дзіцячай творчасці Нясвіжскага раёна. Педагогі пазнаёмяцца з экспазіцыяй Цэнтра тэхнічнай творчасці дзяцей і моладзі Салігорскага раёна «Як важна жыць пад мірным небам», прысвечанай 75-й гадавiне вызвалення Беларусі.
На інтэрактыўнай пляцоўцы «Планета навуковых цудаў» госці ўбачаць досвед працы Вілейскага раённага цэнтра дадатковай адукацыі дзяцей і моладзі па арганізацыі з навучэнцамі навукова-пазнавальных эксперыментаў з выкарыстаннем простых і бяспечных матэрыялаў.
Педагогаў рэспублікі чакаюць паказальныя выступленні юных авіямадэлістаў Салігорскага і суднамадэлістаў Слуцкага раёнаў. Яны змогуць пазнаёміцца з экалагічнымі праектамі навучэнцаў Цэнтра творчасці, турызму і экскурсій дзяцей і моладзі г. Жодзіна з ужываннем робататэхнікі, працай дзіцячых і маладзёжных арганізацый, дзейнасцю аб'яднанняў па інтарэсах фізкультурна-спартыўнага профілю.
Гэта і многае іншае чакае гасцей маштабнага свята, якім абавязкова стане ў гэтым годзе Рэспубліканская тыдзень устаноў дадатковай адукацыі дзяцей і моладзі.
Міншчына гасцінная чакае вас!
Галоўнае ўпраўленне па адукацыі Мінскага аблвыканкама
Карта сайта