У Раванічах дружная школьная сям'я папоўнілася 10 першакласнікамі. Ганаровае права вывесці іх на першую школьную лінейку далі выпускнікам 11-га класа.
- Самае хвалюючае і кранальнае свята сёння ў нашых першакласнікаў, - адзначыла дырэктар Раваніцкага дзіцячага сада - сярэдняй школы Валянціна Ільмоўская, адкрываючы школьную лінейку. - Я жадаю, каб у іх на шляху разам з класным кіраўніком Наталляй Іванаўнай Кацько ўсё атрымалася, каб яны дасягнулі вялікіх поспехаў.
Па традыцыі на школьнай лінейцы прысутнічалі ганаровыя госці: начальнік упраўлення па адукацыі, спорту і турызму райвыканкама Ларыса Асановіч, кіраўнік спраў Раваніцкага сельвыканкама Ірына Макаранка, дырэктар ААТ «Раванічы» Сяргей Кіпець і галоўны спецыяліст па ідэалагічнай рабоце прадпрыемства Тамара Цітавец, настаяцель Крыжаўзвіжанскай царквы айцец Аляксандр. Яны прэзентавалі школе спартыўны інвентар і вучэбны дапаможнік. Сельскагаспадарчая арганізацыя «Раванічы» дапоўніла спартыўныя падарункі грашовым сертыфікатам на 250 рублёў, яшчэ 1000 рублёў прафсаюзная арганізацыя прадпрыемства выдзеліла ў рамках агульнарэспубліканскай акцыі па падрыхтоўцы дзяцей у школу. Акрамя таго, Сяргей Кіпець і Тамара Цітавец адзначылі вучняў, праявіўшых сябе падчас працоўнага лета.
Валянціна Ільмоўская і Ларыса Асановіч выказалі словы падзякі бацькам і педагогам за узаемадапамогу ў выхаванні дзяцей, шэфствуючым над школай прадпрыемствам - за садзейнічанне ва ўмацаванні матэрыяльна-тэхнічнай базы ўстановы адукацыі.
- Мне вар'яцкi хочацца, каб тысячы узнагарод і медалёў у новым навучальным годзе заваявалі педагогі і навучэнцы гэтага творчага і прафесійнага калектыву, - прызналася Ларыса Асановіч.
Фінальным акордам ўрачыстай лінейкі стаў першы школьны званок, які далі вучаніца першага класа Марыя Глухенька і адзінаццацікласнік Сяргей Дзямідчык. Ён сабраў вучняў на ўрок, які ў гэтым годзе называецца «Занімай, Беларусь маладая мая, свой пачэсны пасад між народамі!».
Карта сайта