Ці то клімат зараз наш змяніўшыся спрыяе іх «прыжыванню», ці то рукі гаспадыні такія клапатлівыя, што інакш як буяным красаваннем і не могуць аддзячыць расліны? Дакладна гэта невядома, затое на ўвазе - сажалка з нiмфеямi, шмат руж - чайна-гібрыдных, рознакаляровых, а таксама павойных.
Вегела, фарзiцыя, гартэнзіі, шматлікія лiлейнiкi, хосты, клематысы, петуніі, рабчык імператарскі. На жаль, ужо адкрасавалі рознакаляровыя гатункавыя касачы, півоні, цюльпаны...
Акрамя ўсёй гэтай кветкавай прыгажосці, ёсць сад і агарод. У садзе таксама паўднёвыя дрэвы - нектарын, айва, вінаград, яблыні і грушы, на двары - туі.
Амаль пятнаццаць гадоў жывуць гэтыя працавітыя гаспадары ў Горкаўскай Слабадзе. Купілі тут дом. Усе перабудавалі ў ім нанова, на свой густ. А смак, як відаць, добры. Усе ў двары прадумана. Дзве альтанкі, зробленыя рукамі Сяргея Сцяпанавіча з дапамогай сыноў, лазня, гаспадарчыя пабудовы.
- Зараз у нас дом з усімі выгодамі, як у гарадской кватэры, і ў той жа час - на свежым паветры жывем, - усміхаецца гаспадар. - Жылі раней у Навалукомлі. Працы там не было, ды і бліжэй да дзяцей захацелася перабрацца - яны ўсе ў Мiнску. Іх трое: дачка і два сыны, тры ўнучачкi і ўнучок. У Новалукомлі кватэра была трохпакаёвая, дача. Там таксама ў нас шмат чаго было. Многія расліны мы выпісвалі па пошце, хацелася, нешта новае вырошчваць. І яны прыжываліся. Вось і тут працягваем гэтым займацца.
Як толькі хапае сілы мужчыну трымаць у руках такi гарбуз? Важыць ён 72 кілаграма! І такіх гарбузоў шмат на гародзе. Гаспадыня робіць з іх розныя прысмакі: «апельсінавае» варэнне, цукаты...
Тут, у Горкаўская Слабадзе Алена Аляксандраўна займалася хатняй гаспадаркай, трымалі жывёлу. Сяргей Сцяпанавіч працаваў прарабам у «Лядзенскiм». Потым у РСУ. Шмат працаваў на будоўлі дамоў па праграме будаўніцтва аграгарадкоў: у Раванічах, Турце, Ачыжы і іншых. А да таго займаўся будаўніцтвам на атамных, цеплавых станцыях, шмат ездзіў па камандзіроўках...
На развітанне гасцінныя гаспадары пачаставалі хатнім печывам і духмяным чаем з айвой. Як адзначыў Сяргей Сцяпанавіч, які сам з задавальненнем яго заварвае, айва, нават, больш карысна цытрыны і смачней. І нельга з ім не пагадзіцца...
Таццяна Марцьянава. Фота аўтара
Карта сайта