Супрацоўніцтва Міншчыны і Чунцын пачалося ў 2002 годзе. Менавіта тады было падпісана пагадненне аб узаемадзеянні ў гандлёва-эканамічнай, навукова-тэхнічнай і культурнай галінах. Але адмысловае развіццё гэтыя міжрэгіянальныя адносіны атрымалі ў апошнія гады.
Значна павялічыўся тавараабарот паміж Мінскай вобласцю і Чунцын, мацнеюць і культурныя сувязі. Так, начальнік галоўнага ўпраўлення ідэалагічнай работы, культуры і па справах моладзі Мінскага аблвыканкама Таццяна Хмель адзначыла, што прадстаўнікі Чунцын выказваюць зацікаўленасць у развіцці сумесных праектаў і абмене вопытам. У рамках дзелавой паездкі адбудзецца сустрэча з дырэктарам культуры і турызму горада Чунцын, дзе будуць абмеркаваны далейшыя перспектывы супрацоўніцтва. Акрамя таго, дэлегацыя наведае Вялікую народную залу, балетную школу Чунцын, беларускі цэнтр культурнай і турыстычнай прадукцыі.
У складзе дэлегацыі таксама працуюць сродкі масавай інфармацыі.
- Мы запрасілі да ўдзелу нашых партнёраў - тэлеканал СТВ, а таксама раённыя СМІ. Неабходна ўзмацніць інфармацыйны ўзаемаабмен паміж двума рэгіёнамі. Мы раскажам аб выдатным горадзе Чунцын, а нашы кітайскія калегі напішуць пра Мінскую вобласць, - дадала Таццяна Хмель.
Праграма для прадстаўнікоў сродкаў масавай інфармацыі абяцае быць насычанай. Адной з яркіх кропак вялікага маршруту стане экскурсія ў карпарацыю Чунцінскага радыё- і тэлевяшчання. Але галоўнай падзеяй візіту будзе канцэрт, прысвечаны 70-годдзю з дня ўтварэння Кітайскай Народнай Рэспублікі. У мерапрыемстве прыме ўдзел народны вакальны ансамбль «Пліса» са Смалявіцкага раёна. Калектыў выступіць з аўтарскімі і народнымі кампазіцыямі на святочнай сцэне.
Візіт працягнецца да 1 кастрычніка ўключна.
Ларыса Коршун, прэс-сакратар Мінаблвыканкама
Карта сайта