У гэтым годзе форум праходзіў у Брэсце на працягу двух дзён, 5 і 6 кастрычніка. Горад нядаўна адзначыў сваё тысячагоддзе, акрамя гэтага, у 2019 годзе Брэст з'яўляецца культурнай сталіцай СНД.
З кожным годам экспазіцыі на форуме становяцца больш маштабнымі і разнастайнымі. Яны прадстаўляюць гісторыю, народныя рамёствы, нацыянальныя традыцыі, культурную спадчыну і многае іншае. Было вельмі шмат інтэрактыву, шматлікія музеі праводзілі квэсты і майстар-класы.
Тэма форуму была «Музеі: навука, інавацыі, камунікацыі», таму прысутнічала шмат сучасных тэхналогій, якія выкарыстоўваюцца ў музейнай справе. Радыёгіды, галаграмы, 3D акуляры, якія акунаюць наведвальніка ў віртуальную рэальнасць і іншае.
Асаблівую цікавасць выклікала деловая праграма форуму. Заўсёды цікава і карысна паслухаць прафесіяналаў музейнай справы, даведацца пра новыя падыходы і дасягненнi, пазнаёміцца з вопытам замежных спецыялістаў. Дарэчы, на форуме былі навукоўцы і музейшчыкі з Беларусі, Расіі, Украіны, Арменіі, Германіі, Польшчы, Латвіі і Кітая.
Наш музей прадстаўляў экспазіцыйна-выставачны праект «Кампазітар Станіслаў Манюшка - дзеяч беларускай музычнай культуры».
Праца над ім пачалася ў 2017 году, калі на конкурс мясцовых ініцыятыў, які праходзіў у рамках праекта міжнароднай тэхнічнай дапамогі ЕС-ПРААН «Садзейнічанне развіццю на мясцовым узроўні ў Рэспубліцы Беларусь» музеем сумесна з Чэрвенскай дзіцячай школай мастацтваў быў распрацаваны праект «Музычная гасцёўня Станіслава Манюшкі», які паспяхова рэалізаваны. Асноўнай ідэяй было захаванне музычнай спадчыны кампазітара, павышэнне турыстычнага патэнцыялу раёна. Калектывам музея была распрацавана канцэпцыя мастацкага афармлення музычнай гасцінай, закуплена неабходнае прафесійнае асвятляльнае і гукаўзмацняльнае абсталяванне, адзенне сцэны, канцэртны раяль і інш.
Музычная гасцёўня Станіслава Манюшкі была ўрачыста адкрыта 27 лістапада 2017 года. На мерапрыемстве прысутнічалі кіраўнік прадстаўніцтва Еўрапейскага Саюза і прадстаўнік ПРААН у Рэспубліцы Беларусь, дыпламаты з Вялікабрытаніі, Германіі, Швецыі, Нідэрландаў, а таксама прадстаўнікі СМІ, шматлікіх турыстычных фірмаў, грамадскасць.
Наступным этапам у працы над праектам стала стварэнне пастаяннай экспазіцыі. У лютым 2018 года ГУ «Чэрвеньскі раённы краязнаўчы музей» стаў пераможцам абласнога конкурсу «Творчы Алімп Міншчыны» у намінацыі «Музейная справа» і атрымаў грант. На працягу года старшым навуковым супрацоўнікам Ірынай Вабішчэвіч, навуковым работнікам Ірынай Середа, галоўным захавальнікам Галінай Кузьміной, мастаком Аляксандрай Зубрыцкай вялася работа па падборы экспанатаў, мастацкаму рашэнню і распрацоўцы эскізаў будучай экспазіцыі, распрацоўцы яе канцэпцыі і г.д. Была закуплена новая мэбля, аформлены тэматычныя дыярамы.
Адкрыццё пастаяннай экспазіцыі «Кампазітар Станіслаў Манюшка - дзеяч беларускай музычнай культуры» прайшло 2 мая 2019 года, напярэдадні святкавання 200-гадовага юбілею з дня нараджэння знакамітага земляка.
З гэтым праектам мы і выступалі на форуме ў Брэсце. Наведвальнікі нашай экспазіцыі маглі не проста пазнаёміцца з гісторыяй жыцця і творчасці кампазітара, але і прысесці ў імправізаванай, утульнай музычнай гасцінай і паслухаць яго цудоўную музыку ў выкананні дырэктара Чэрвенскай музычнай школы мастацтваў Галіны Прышывалка, нашага даўняга і надзейнага сябра і партнёра.
Праект нашага музея быў высока ацэнены прафесійным журы і атрымаў Дыплом I ступені IV Нацыянальнага форуму «Музеі Беларусі».
Дыпломам за ўдзел у IV Нацыянальным форуме «Музеі Беларусі» наш музей быў адзначаны таксама за агульны праект музеяў Мінскай вобласці «Гісторыя і памяць малой радзімы». Гэта музейны альбом фотаздымкаў і паштовак канца XIX - пачатку XX стагоддзяў з фондаў дзяржаўных музеяў Мінскай вобласці. У раздзелах «Шматграннасць жыцця» і «Абліччы часу» прадстаўлены фатаграфіі з фондаў Чэрвеньскага краязнаўчага музея.
Алена ЗАБАРОНАК, дырэктар Чэрвеньскага раённага краязнаўчага музея.
Фота аўтара
Карта сайта