У зборы зямлі з двух брацкіх магіл на Іванічы ўдзельнічалі афіцэры раённага аддзела Дэпартамента аховы на чале са сваім кіраўніком Сяргеем Ермаловічам. Супрацоўнікі аддзела шэфствуюць над гэтымі двума пахаваннямі, круглы год там прыбрана, у ідэальным парадку агароджы, пліты помнікаў і навакольная тэрыторыя.
Унікальна паданне, якое існуе ў мясцовых жыхароў у дачыненні да месца, дзе пахаваны чырвонаармеец Карнееў. Гэта шырокі курган пасярод поля каля вёскі Гарадзішча. Старыя распавядаюць, што чулі яшчэ ад сваіх дзядоў, быццам бы гэты курган насыпалі французы падчас вайны 1812 года. Якая мэта пераследвалася - умацаванне пазіцый, стварэнне ўзвышшы для ўстаноўкі гармат ці нешта яшчэ - цяпер, па сканчэнні больш двухсот стагоддзяў, дакладна не вядома. Семдзесят пяць гадоў назад «французскі курган» стаў апошнім прыстанкам салдата, які загінуў у іншай вайне, не менш жорсткай, крывавай і бессэнсоўнай, зрэшты, як усе войны ва ўсе часы.
У зборы зямлі з гэтага месца і з брацкай магілы на могілках вёскі Турэц, дзе пахаваны 18 невядомых салдат, 17 чырвонаармейцаў і два партызаны, удзельнічалі піянеры Турэцкай школы Ксенія Кукалева і Ілля Шаруба і іх настаўніца Алеся Стасiловiч. Хлопцы вельмі актыўна дапамагалі, чыталі ўсе надпісы на помніках і біркі ад пакетаў для зямлі, задавалі шмат пытанняў. Дзеці ёсць дзеці - нягледзячы на строгасць моманту, яны не прамінулі пахваліцца тым, што наступаюць канікулы і наперадзе некалькі выдатных дзянькоў суцэльнага адпачынку і забавак. Хай выхваляюцца; менавіта за гэта ваявалі прадзеды: каб праўнукі маглі жыць весела і нябедна, радуючыся простым рэчам, усміхаючыся першаму інею на траве, асенняму сонейку, сустрэчным мінакам і будучым канiкулам.
На магіле невядомага салдата ў вёсцы Убель і на брацкай магіле ў вёсцы Пятровінка зямлю збіралі супрацоўнікі рыбгаса «Волма» Кацярына Нягодзька і Алена Мукавозчык.
У цэнтры Клінка побач з будынкам сельвыканкама размешчаны мемарыял з некалькімі індывідуальнымі магіламі і агульным помнікам загінулым жыхарам вёскі.
На гэтым месцы збор зямлі правялі работнікі сельвыканкама Святлана Гаргун, Таццяна Шыла і Ала Корзун і прадстаўнікі Валмянскага лясніцтва Сяргей Купрэйчык і Міхаіл Кандраценка.
Васіль Сурага і работнікі сельвыканкама таксама сабралі зямлю з пахаванняў у Волме, Кукалеўцы і Лежнях.
Усяго ў раёне сабрана зямля з 97 пахаванняў. Хутка сімвалічныя пакеты з зямлёй пачнуць свой шлях на вечнае захоўванне ў Храм Усіх Святых. Гэтае мерапрыемства адбудзецца ў сталіцы Беларусі будучай вясной, напярэдадні 75-годдзя Перамогі.
Наталля КАРАЛЬКЕВІЧ. Фота аўтара
Карта сайта