Адкрываючы ўрачыстасць, генеральны дырэктар дзяржаўнага аб'яднання «Жыллёва-камунальная гаспадарка Мінскай вобласці» Васіль Шашок адзначыў, што ўвод гэтага аб'екта ў эксплуатацыю не толькі даў магчымасць палепшыць якасць жыцця чэрвенцаў, але і стаў важным крокам у рамках рэалізацыі пастаўленай кіраўніком дзяржавы задачы па забеспячэнню энергетычнай незалежнасці краіны. Па папярэдніх падліках, новая кацельня, аснашчаная кандэнсацыйным эканамайзерам вытворчасці кампаніі «Enerstena» - першымі ўстаноўкамі падобнага тыпу ў Беларусі, будзе на 30 адсоткаў эканомней, чым старая. Такі эфект дадуць выкарыстанне ў якасці паліва драўнянай дранкі, атрыманне амаль чвэрці цеплавой энергіі за кошт адводзiмых дымавых газаў і замена цеплавых сетак працягласцю 8,5 кіламетра. Пры гэтым на аб'екце дадаткова ўстаноўлены два газавыя катлы. Іх мяркуецца выкарыстаць у выпадку неабходнасці рамонту асноўнага абсталявання, або падчас моцных маразоў.
... Шчырую ўдзячнасць усім, чыімі высілкамі быў рэалізаваны праект, выказаў намеснік старшыні Дзяржстандарту - дырэктар Дэпартамента па энергаэфектыўнасці Міхаіл Малашанка. Ён звярнуў увагу на тое, што новая кацельня ў Чэрвені, акрамя ўсіх сваіх эканамічных пераваг, мае прывабны выгляд і вонкава больш падобная на гандлёвы цэнтр.
- Спачатку былі тыя, хто ставіўся да будаўніцтва такой кацельні з недаверам, - распавёў ён. - Маўляў, якія мясцовыя віды паліва, навошта нам вяртацца ў 18-19 стагоддзе, да печкі? А вось паглядзіце, як выглядае «печка» дваццаць першага стагоддзя!
Дырэктар ЗАТ «Enerstena» Лаймонас Кучынскас перадаў сімвалічны ключ ад кацельні намесніку старшыні Чэрвеньскага райвыканкама Аляксандру Гадуну.
Затым яны разам з генеральным дырэктарам дзяржаўнага аб'яднання «Жыллёва-камунальная гаспадарка Мінскай вобласці» Васілём Шашком перарэзалі чырвоную стужку на ўваходзе ў будынак.
Завяршылася ўрачыстасць экскурсіяй па кацельні, падчас якой Лаймонас Кучынскас падрабязна распавёў пра тое, як яна працуе.
Ігар Адамовіч. Фота аўтара
Карта сайта