На пачатку сустрэчы бібліятэкары павіншавалі яе ўдзельнікаў са святам. Потым гучалі вершы беларускіх паэтаў Сяргея Грахоўскага, Эдзі Агняцвет, Адама Русака, Ніны Мацяш, Любові Тарасюк, Максіма Танка, Сымона Блатуна, Леаніда Якубовіча, у якіх самыя лепшыя пачуцці і думкі звернуты да мамы, матулі, маці… Затым кожны з удзельнікаў мерапрыемства прыгадаў прыемныя моманты жыцця, звязаныя з адзінай, роднай і самай дарагой у свеце жанчынай.
Ва ўспамінах Веры Ніціеўскай маці засталасядобрай і ласкавай. жанчынай. Разам з ёй яна наведвала кірмашы. Там заўсёды было весела і шматлюдна. Памятае яна і смачную яечню, якую гатавала маці. Час быў такі – радаваліся простай страве…
Добрым арганізатарам была матуля ў Галіны Баравік. Яна працавала ў сельскім доме культуры. Разам яны ўдзельнічалі ў масавых мерапрыемствах. Маці настояла, каб усе дзеці атрымалі вышэйшую адукацыю. Вельмі добрага смаку было сала, якое матуля саліла ў кубле і варэнне з трускалак.
Прыгажуняй была матуля ў Зоі Сушкевіч. Яна вельмі добра спявала і танцавала. І зараз у вачах Зоі Альбертаўны стаіць незвычайнай прыгажосці яе крэпдэшынавая сукенка. Трэба сказаць, што любоў да танцаў ёй перадалася ад маці. Зоя Сушкевіч – заўзятая ўдзельніца танцавальнага гуртка “Я магу”, дзе развучваюць такія танцы, як падэспань, кракавяк, ойра-ойра…
Лідзія Манулік узгадала, што яе матуля была вельмі добрай і спагадлівай жанчынай, заўсёды ішла на дапамогу людзям, з павагай ставілася да іх і тыя адказвалі ёй тым жа.
А ў Яўгена Мшара матулю забілі немцы, калі яму быў усяго год. Таму і не памятае яе…
Васілю Шачку пашанцавала, таму што яго матуля жыве, ёй 93 гады. Жыве і яго цешча. З яго вуснаў гучалі самыя пяшчотныя і ласкавыя словы ў іх адрас.
Мерапрыемства праходзіла ў цёплай і душэўнай атмасферы. Напрыканцы сустрэчы зрабілі фота на памяць.
Святлана ЖДАНОВІЧ,
загадчык аддзела абслугоўвання і інфармацыі
Чэрвеньскай цэнтральнай раённай бібліятэкі
Карта сайта